19,338 klur mang ka Sorkar Pdeng ïa ki surok bad ki surokbah ha NE ban kyntiew ïa ka Tourism: Sonowal

Shillong, Naitung, 27: U Myntri ka Sorkar Pdeng uba khmih ïa ka tnat Ports, Shipping & Waterways, u Sarbananda Sonowal ha ka sngi Saitjaiñ u la pyntip halor ka Mang Tyngka 2024 jong ka Sorkar Pdeng na ka bynta ka thaiñ Shatei Lammihngi ha ka jingïalang kaba la long ha nongbah Shillong.
Haba kren halor ka jingpynkupbor ïa ki riewlum, u Sonowal u la ong, “ka Mang Tyngka jong ka Sorkar Pdeng, 2024 ka pynkhreh ïa ka India sha ka lynti ban long ka Viksit Bharat. Da ka bor bad ka jingphaikhmat ba thymmai, ka mang tyngka ka thmu ban kyntiew ïa ka ïoh ka kot, ki kam karkhana bad ki kam rep da ka jingtbit ki samla, ki longkmie & ki jaitbynriew riewlum jong ka thaiñ shatei lammihngi. U Myntri Rangbah duh jong ngi, Narendra Modi u la ithuh ïa ka thaiñ Shatei Lammihngi kum ka ‘Astalakshmi’ bad ka kor ba thymmai jong ka jingkiew shaphrang ka India.”
“Hapoh ka jingïalam u Modi, ka bynta ha kane ka mang tyngka na ka bynta ka jingpynkupbor bad jingplie lad ïa ki jaitbynriew riewlum ka la kiew jan 200% lyngba ka jingmang tyngka 13,000 klur ban pyndonkam na ka bynta ka bha ka miat jong ki jaitbynriew riewlum. Na ka bynta ka jingplie lad ïa ki nongshna tiar ha ki rukom tynrai, ki Self Help Group (SHG), ki Scheduled Caste, Scheduled Tribe bad ki longkmie kiba seng kam lajong, ki skhim kum ka PM Vishwakarma, PM SVANidhji, National Livelihood Mission, bad Stand Up India, ka mang tyngka ka la kyntiew ïa ka jingbuh pisa na ka bynta jong ki. Da kawei pat ka skhim ba kyrpang na ka bynta ka jingïoh ïa ka hok ha ka imlang sahlang ïa ki jaitbynriew riewlum, la pynbna ïa ka Pradhan Mantri Janjatiya Unnat Gram ha kane ka mang tyngka kaba thmu ban kyntiew ïa ka jinglong ka ïoh ka kot bad ka imlang sahlang jong ki jaitbynriew riewlum. Kane kan ai jingmyntoi ïa 5 klur ngut ki riewlum ha 63,000 tylli ki shnong,” u la ong.
Haba kren shaphang ka jingkiew ka jingmang tyngka ha ki kam rep ha ka thaiñ Shatei Lammihngi, u Sonowal u la ong, “hapoh ka jingïalam jong u Myntri Rangbah duh Narendra Modi, ngi trei na ka bynta ka jingpynurlong ïa ki lad kiba don ha ka thaiñ shatei lammihngi kum ka jaka pdeng jong ka rukom rep tynrai bad Horticulture kumjuh ruh ka jingïarap ïa ki samla ba donsap jong ngi ban long ki briew ba la tbit ha ka kam. Ka jingpyllait ïa ki 109 jait ki symbai jong 32 jait ki jingthung horticulture ka plie lad ïa ka jylla Meghalaya, kaba lamkhmat ha ka bynta, ban plie ki lad kamai kajih bad pynduna ka jingktah na ka jingkylla ka suinbneng.”
“Lyngba ka digital crop survey ba la tyrwa, ka jingïoh ram kan kham suk lyngba ki Kisan Credit Card. Ka jingmang tyngka kaba T. 598 klur na ka bynta ka projek ba ïadei bad ki kam rep ba ïaineh kan tehlakam ïa ki jingktah ka jingkylla ka suin bneng, ka jingtwa khyndew bad ki jingbam khniang ïa ki mar rep bad kine baroh ki kyntiew bha ïa ki lad ki lynti kiba don ha ki kam rep ha ka thaiñ, u la bynrap.
U Sonowal u la ong shuh shuh, ka mang tyngka ka thmu ruh ban kyntiew ïa ki kam shna tiar bad ki kam ai jingshakri, khamtam lyngba ka skhim MUDRA kaba ai lad shim ram ïa ki MSME. Kane kan pynkupbor ïa ka jingseng kam lajong bad kan plie ruh shibun ki lad ïoh kam. Ka dei namar ka jingthmu jong u Myntri Rangbah Duh Narendra Modi ba ka skhim Credit Guarantee ba thymmai kan ai jingkyrshan ruh ïa ki MSME ban kyntiew ïa ka bor treikam jong ki bad wanrah ïa ka jingkiew shaphrang ki karkhana ha ka thaiñ.”
“Ka Direct Benefit Transfer (DBT), ka sienjam ba kyrpang jong ka Sorkar Modi ka tyrwa T 15,000 ha lai tylli ki bynta ïa kito kiba dang shu ïoh kam bad ïa kane yn pynïasoh bad ka Meghalaya Industrial & Investment Promotion Policy. Kane kan kyntiew ïa ki karkhana bad ka jingplie lad ïoh kam ha ka jylla. Ban plie ïa ka bor jong ki samla, yn kyntiew ïa 1000 tylli ki ITI bad yn tei ïa ki hostel jong ki kynthei, ki jaka ban sumar ïa ki khynnah bad kane kan plie lad ïa ki longkmie ba kin trei ha ki karkhana,” la ïathuh u Sonowal
Ka mang tyngka 2024 jong ka Sorkar Pdeng ka la buh pisa ruh ban kyntiew ïa ki jingdon jingem lyngba ka Phase IV jong ka Pradhan Mantri Gram Sadak Yojana ban pynbiang ïa ki lad ka leit ka wan bal ah ban pyndonkam baroh shi snem ha ki jaka ba kham kyndong ba kynthup ruh ïa ka thaiñ shatei lammihngi.
Ka PMGSY ka la pynïasoh lypa 3,482 km ki surok ha kylleng ka Meghalaya ha kaba ka jinglut jingsep ka long T 2310.76 klur naduh u snem 2014.
Ka mang tyngka ka la buh T 2.66 lak klur na ka bynta ka jingkyntiew ïa ki jaka nongkyndong ba kynthup ïa ki jingdon jingem ha ki jaka nongkyndong ha ka thaiñ shatei lammihngi. Ka jingbuh sa T 19,338 klur ha ka mang tyngka jong ka Sorkar Pdeng ban kyntiew ïa ki surok bad ki surok bah ha ka thaiñ shatei lammihngi kan kyntiew ïa ki jingdon jingem kaba ïadei bad ki kam jngoh kai ha ka thaiñ ba kynthup ruh ïa ka Meghalaya.
Ha kane ka jingïalang, la ïashim bynta ruh da u Myntri ka Sorkar Meghalaya u Bah Alexander Hek, u Chairman jong ka Meghalaya Tourism Development Corporation (MTDC) u Bah Sanbor Shullai, u President ka BJP Meghlaya State Unit u Rikman G. Momin, u Vice Chancellor ka North Eastern Hill University (NEHU) u PS Shukla bad kiwei kiwei.