Shillong, Naitung 28: Ka Tynring Sports and Games Association ryngkat ka jingsnohkti lang bad ka Seng Samla Shnong Tynring ka la pynkut noh ia ka Open to All Knockout Football Tournament ha Madan Football Tynring.
Ka jinglehkai final ka la long hapdeng ka Charger F.C bad ka KDR F.C, ha kaba ka KDR F.C ka la ïohrah ïa ka nam lahduh da kaba pynliem ïa ka Charger F.C da 1 kol la nod kaba la thep da u Rijied Sun ha ka minit kaba 7.
Ïa kane ka lympung ïalehkai kynjat bol, la wan ban pynhap pyrda noh da u Bah Shakliar Warjri uba dei u myntri badei khmih ïa ka tnad Sports kum u Kongsan, u Bah Pyniaid Sing Syiem uba dei u MDC ka thaiñ bad CEM ka KHADC kum u Symbud Kongsan, Wardington Nongrum uba dei u Sordar ka Tynring, ki nongïaalam shnong, ki seng samla, ki dkhot jong ka Tynring Sports and Games Association bad ki paidbah nongwan peitkai.
U Bah Shakliar Warjri Myntri haba ai jingkren u la ong ba kum u myntri badei khmih ïa ka tnad sports, ka dei ka kamram jong u ban kner ïa ki kti jingïarap na ka bynta ban kyntiew ïa ki jingïalehkai bapher bapher bad ka jingïatreilang kan long ka jingsarong ïa ka jylla lada ïoh ïa ka jingjop bad na ka liang u myntri u la noh synñiang 1 lak tyngka sha ka Tynring Sports Club.
U CEM u la ai khublei ïa ka Tynring Sports Club kaba la pynlong ïa kane ka tournament ban sei kyrpang ïa ka sap ka phong ki samla kiban ïakhun ha ki tournament kiba heh bad u la pyntip ba ladep ban ai 10 lak tyngka ban pynbit pynbiang ïa ki toilet bad ki dressing room bad nalor kane u CEM u la ai sngewbha 1 lak 50 hajar tyngka na ka bynta ki khusnam.
