Shillong, Nailar 12: Ka dei ka jingïalehkai kaba itynnat ha ka jingïaknieh rung final jong ka lympung U-20 Fourth Division 2024 bala pynïaid da ka Shillong Sports Association ha ka Lah Sngi U Blei ha kaba ka kynhun ïalehkai jong ka Umrynjah SC ka la pynliem noh ïa ka Umïew U Sam ban ïoh rung sha ka final.
Kumban shu kdew, baroh ar kynhun ki ladep pynthikna lypa ban ïoh ïakhun ha ka kyrdan 3rd Division ha ka samoi ban wan hadien ba ki la poi sha ka wat ïakhun semi final, namar katkum ki kyndon jong ka Fourth Division ka SSA, baroh saw kynhun kiba poi semi final kin shah kyntiew kyrdan ha ka Third Division na bynta ka samoi ban wan.
Related Posts
Haba phai sha ka jingïalehkai kaba la long ha SSA Stadium, Polo, lah ban ong ba baroh arliang mamla ki long kiba mar ryngkatbor hynrei ka shi kol na u Wanboklang L Nongbri ha ka khyllipmat shuwa ban kut ka por (70+2 minit) ka la pynïakhlad ïa ka jingïakhaid, ha kaba ka Umrynjah ka la pynliem noh da 1-0 kol ïa ka Umiew Maw U Sam SC ban long ka kynhun ba nyngkong ban jam sha ka final mynta ka Shillong Sports Association’s U-20 Fourth Division.
U Wanboklang (70’+2) u la dei tang ma u marwei u rnagïalehkai ba ïoh ban pynkhihjar ha kane ka jingïalehkai kaba baroh ar kynhun ki long kiba ïakhaid. Hadien kane, ka Umrynjah kan pynkhreh ban aireng ïa ka nongjop ha ka semi final kaba ar.
Ka semifinal kaba ar kan long ha ka 19 tarik mynta u Nailar, ha kaba ka Madanrting SC bad ka Madan SCC kin ïaknieh ban ïohrung sha ka final, ha ka por 3:45 nohphaisngi ha SSA Stadium, Polo. Ka final kan long ha ka 24 tarik mynta u Nailar, 2024.