SSA 2nd Division: Pynjemkhnap ka Mawpat ïa ka Tynring ha ka QF; jop ka Jongksha ïa ka Lumshyiap ha ka jingïakhun Bottom League

Shillong, Nailur 04: Ka Mawpat SC ka la pynliem noh ïa ka Tynring SC da 6-1 ha ka Quarterfinal ba nyngkong jong ka Second Division 2026 ba la pynïaid da ka Shillong Sports Association, ba la long hynne ka sngi Thohdieng ha madan First Ground-SSA Stadium.
U Donboklang Lyngdoh u la long u namtam na ka bynta Mawpat da kaba thep hat trick, kiba la wan ha ka minit kaba 33, 55 bad 81. Kiwei pat ki kol jong ka Mawpat la thep da u Dajiedlang Wanshong (10 & 29’) bad u Aibok Lawriniang (90+3’).
Ka Tynring ka la ïohlad ban pynkhihjar shi sien lyngba u Nelsonroy Mynsong (12’).
Ha kawei pat ka liang, ka Jongksha SC ka la sdang ïa ka jingïakhun Bottom League ha ka rukom kaba don jingkyrmen, hadien ba ka la pynjemkhnap haduh 8-1 kol ïa ka Lumshyiap SC ha MFA Ground.
U Babiang Umsong (30, 80 & 87’) u la thep hat trick na ka bynta ka Jongksha, katba u Nangiar kshiar (10’), u Bishar Nongspung (31’), u Fernando Malieh (38’), u Janbor Nongspung (64’) bad u Iaishah Kharsahnoh (79’) ki la noh synñiang mar shi kol sha ka kynhun.
Ka Lumshyiap ka la thep ïa ka shi kol lyngba u Demanding Syngkli ha ka minit kaba 25.
Ki don lai tylli ki kynhun kiba hap ban ïakhun ïa kane ka Bottom League ban lait na ka jingshah pynhiar kyrdan (Lumshyiap, Mawkriah West bad ka Jongksha), hadien ba baroh lai ki la pyndep sha trai duh ha la ki jong ki Group.
Ka jingïakhun Quarter final jong ka SSA 2nd Division ha kane ka sngi Saitjaiñ (05.09.2026) kan long hapdeng ka Umlyngka SC pyrshah ïa ka Sohryngkhsm SC. Ka jingïakhun kan long ha ka por 3:15P baje nohphai sngi.