SPL 2025: Wanphai ka Mawlai hakhlieh duh naba jop ïa ka Laitkor

Shillong, Risaw 05: Hadien ka jingshah rem ha ka jingïalehkai ba khatduh, ka Mawlai ka la wanphai ryngkat ka mynsiem ïakhun kaba tyngeh ban pynliem ïa ka Laitkor da 4-0 kol ha ka jingïakhun jong ka lympung Shillong Premier League 2025 kaba la long ha ka janmiet jong ka sngi Saitjaiñ (04 tarik Risaw) ha SSA Stadium, madan First Ground, Polo.
Kiba la pynkhihjar ha kane ka sngi na ka bynta ka Mawlai ki long u Robertson Khongriah (45’), u Ricky Chyne (60’), u Loving Suting (77’) bad u Damitre Kynjing (83’).
Kane ka jingjop ka la kyntiew biang ïa ki ha khlieh duh ha ka thup kyrdan jong ka SPL 2025, da kaba kamai mynta 15 poiñ na ki hynñiew tylli ki jingïalehkai. Kane ka pynlong ïa ka Mawlai ban tam ïa ka Nangkiew Irat (13) bad ka Shillong Lajong kaba bat ïa ka nam lahduh (12) hynrei kine kiwei pat ki artylli ki klob ki dang don mar kawei ka jingïakhun ha kti ban pyndep ïa ka kylla kaba hynñiew (Round-7). Katba ka Laitkor pat ka dang sah ha ka kyrdan kaba hynñiew da kaba kamai 8 poiñ.
Ka Mawlai ka la jam sha kane ka jingïakhun hadien ka jingshah rem kaba pynkyndit tang lai sngi mynshwa, ha kaba ka la shah pynliem noh da 4-3 kol ha ka Lajong wat hadien ba ka la ïoh ban lamkhmat lypa da 3 kol ïa ka jingïalehkai. Ha kawei pat ka liang ka Laitkor ka la don ha ka jingïakhun kaba khlem shah rem haduh lai sien (watla ar tylli na kine ki jingïalehkai ka la kut ha ka jingïakhaid).
Ka Laitkor ka la sdang kham khlaiñ ïa ka jingïakhun da kaba ïoh ban pyrshang lai tylli ki kabu sha kol hapoh san minit mar ïa sdang, hynrei man ka sien ba ki pyrshang la ïoh ban kem noh khlem jingbakla da u rangapkol ka Mawlai u Banshanskhem Kharsyntiew.
Ha kawei pat ka kut jong ka madan, u Loving u la ïohpdiang ïa ka bol pashat (cross) na u Fairming Suting hynrei ka jingpyrshang jong u Loving ka la tyngkhuh ïa u crossbar shuwa ba kan hiar shapoh. Utei u rangïalehkai No. 10 jong u Mawlai ula sah ha ka lyngngoh ba ka bol kam shym la ïaid lait ïa u laiñ, watla ka la don khyndiat ka jingujor na ka ben shong ki rangïalehkai bujli jong ka Mawlai.
Nangta, tang shuwa ban kut ka kylla step, ka Mawlai ka la ïoh ïa ka free-kick kaba ka Laitkor ka la ïoh ban pynkiar shipor ïa ka bol na ka jingma. Hynrei ka bol ka la wan hap ha u Robertson, uba la khyrwit jlang shapoh kol.
Ka la don ka jingkylla ha ka kylla miet, ha kaba ka Mawlai ka la ïalehkai kum ka kynhun kaba kham pher bad kaba kham khlaiñ. Mar ïa kynjoh shi kynta thik ka jingïakhun ka Mawlai ka la pynkhihjar biang lyngba u Ricky lyngba ka corner kick kaba la pashat da u Kevin Rymbai.
Nangta u Loving u la pynjlan ïa ka kol lamkhmat da 3-0 ha ka minit kaba 77, kaba buh ïa u ha khmat duh jong ka thup ki nongthep kol ba bun tam jong ka SPL 2025. Mynta ka samoi u Loving u la ïoh ban thep 7 kol. Hadien kata u Damitre u la thep ïa ka kol ba nyngkong jong u ha kane ka samoi hadien ba ïohpdiang ïa ka bol na u Samlang Rympei.
Ka Mawlai ka la ïoh shuh shuh ki kabu hadien kane, ha kaba u Loving u la shah khanglad arsien ha u rangapkol ka Laitkor u Hukumskhem Marbaniang, uba dang mih madan nyngkong ban ap kol ha kane ka samoi.
Ka Laitkor ka la ïoh la ka jong ka kabu ha ka kylla miet, kum ha ka por ba u Sandy Kharkongor ula shah khanglad ha u Banshanskhem, hynrei lait na kane, lah ban ong ba kam shym la long ka jingïalehkai kaba seisoh na ka bynta jong ki bad kam shym la lah ban shem ïa ka lad ban pynpra ïa ki rangïalehkai ba shadien jong ka Mawlai.
Ka jingïalehkai jong ka SPL 2025 ha kane ka sngi Nyngkong kan long hapdeng ka Sawmer (kyrdan ba san) pyrshah ïa ka Lajong (kyrdan ba lai) ha ka por 4:30 baje janmiet.