Shillong, Naiwieng 08: Ka Rangdajied United FC ka la ïoh ban khur ïa ka jingjop kaba ki la thrang shisha hynrei kane ka la urlong hadien ka jingïakhun kaba jwat pyrshah ïa ka Nongrim Hills SC ha ka lympung OC Blue Shillong Premier League 2024 ha kaba ka la jop salit da tang 1-0 kol.
Ka kol jong u Dibormi Kassar ha ka 87 minit shuwa ban kut artad ka por ka la long kaba kongsan ïa ka Rangdajied ban khur ïa ki lai point na kane ka jingïalehkai. Kumta da kane ka namjop, ka la pynlong ïa ka Rangdajied ban jam na ka kyrdan ba hynñiew sha ka kyrdan ba saw ha ka miej, katba ka Nongrim Hills ka la hiar na ka kyrdan ba hynriew sha ka kyrdan ba hynñiew.
Lah ban kdew ba ka kylla step ka la long kaba biang ïa baroh arliang mamla hynrei ka jingduna ki nongthep ban pynurlong ïa ki kabu ksiar ka la pynlong ïa ki ban ïakhaid, khamtam ka Rangdajied kaba la ïoh pyrshang bunsien.
Hynrei ka jingïaibteng jong ka Rangdajied ban ñion ka la lah ban pyndkut ïa ka kut ba skhem jong ka Nongrim Hills ha ka 87 minit, watla ka jingpyrshang kaba nyngkong la shah khanglad, hynrei ka bol ka la wanphai biang sha u Dibormi u ba khlem pynsepei bad pynkhih ïa katei ka kol bad pynthikna ïa ki lai point na bynta ka Rangdajied.
Ka OC Blue SPL kan khylliap ïa ka taïew da ar tylli ki jingïalehkai ha kane ka sngi Saitjaiñ (09 tarik Naiwieng), ha kaba ka Nangkiew Irat SC kan ïakhun pyrshah ïa ka lahduh ba ïada burom- ka Mawlai SC ha ka por 1 baje mynsngi, bud sa ka jingïakhun hapdeng ka Shillong Lajong FC pyrshah ïa ka Ryntih FC ha ka por 4 shiteng nohphaisngi.
