Shillong, ïaïong 01: Ka lahduh jong ka samoi ba ladep ka lympung SSA Shillong Premier League Division, ka Mawlai SC ka ïai bteng ban pynpaw ïa ka jingkhlaiñbor da kaba pynliem kput ïa ka Sawmer SC da 7 – 2 kol ha ka jingïalehkai kaba long hynne ka sngi ha SSA Stadium, Polo.
Ha kane ka jingïakhun, u Donlad Diengdoh u la kylla long u namtam da kaba khyrwit lai kol na bynta ka kynhun kaba dei artad ka hat trick kaba ar mynta ka samoi, katba u Fairming Suting-u wei pat u rangïalehkai ka Mawlai- u la ïoh ban thep ar kol.
Haba phai sha ka jingïakhun, dei ka Sawmer SC kaba la sdang pynkhihjar nyngkong lyngba u Diego Khriem tang hadien 10 minit ba la ïaid ka por, hynrei ka Mawlai ka la jubab da kaba pynïakhaid lyngba u Donlad Diengdoh ha ka minit kaba 20 shuwa ba un thep ïa ka kol lamkhmat ha ka 24 minit.
Ha ka 34 minit ka Mawlai SC ka la ïoh ban thep ïa ka kol kaba lai na u Robert Khongriah ban lamkhmat ïa ka kylla step da 3-1 kol.
Lah ban kdew ba ka jingïakhun ha ka kylla miet ka Mawlai ka la nang ïohbor bad dei ha ka minit ba 57 ba u Donlad Diengdoh u la ïoh ban thep ïa ka hat trick kaba la nang ai jingkyrmen ïa ka kynhun ban khur ïa ka jingjop.
Wat hadien ba ka kynhun ka la kyrmen ban khur pura ïa ki lai point hynrei pynban ka la bteng ban pynkhih sa lai tylli ki kol kiba la wan lyngba u Fairming Suting ha ka 73 bad 86 minit nangta na u Kevin Rymbai ha ka 75 minit.
Shuwa ban khylliap ïa ka por ka Sawmer SC ka la ïohlad ban pynphai shi kol na u Russel L Nongkynrih ha ka 88 minit, hynrei kane kam shym la lah ïarap pyllait ïa ka kynhun na ka namrem.
Lyngba kane ka namjop ka Mawlai ka shong ha ka kyrdan ba nyngkong ryngkat ki 7 point naki 3 sien ïakhun bad kam pat shym la shah rem naba jop ar sien bad ïakhaid shi sien, katba ka Sawmer na ki 3 sien ïakhun kam pat shym la khur wat tang shi point kaba la pynlong ïa ka kynhun ban hiar sha traiduh ka miej.
Mynta ka sngi yn bteng biang ïa ka wat balai ka SPL, bad ka jingïakhun kan long hapdeng ka Nangkiew Irat SC pyrshah ïa ka Langsning FC ha ka por 3 baje nohphaisngi ha madan SSA Ground, Polo.
