Shillong, Nailar 05 : U kyrtong ka National People’s Party (NPP) na bynta ka elekshon MP Shiteng samoi, u Dr. DRL Nonglait, u la pynpaw ïa ka jingsngewskhem ba un jop ïa ka elekshon, da kaba ong ba ka jingkyrshan kaba u ïohi na ki paidbah ka long kaba ai jingkyrmen bad ka jingsngewskhem ba un poi sha ka thong.
Haba kren bad ki lad pathai khubor ha ka janmiet sngi Balang, u Dr. DRL Nonglait u la ong ba ha kine ki san bad hynriew bnai ba la dep ka jingleit ïalap elekshon ka long kaba ïoh mynsiem bha khamtam haba ki paidbah ki mih ryntih ban pynpaw ïa ka jingshanïah ïa u kum u kyrtong.
Da kaba pynpaw ba ha ka elekshon hi ka jingïakhun kam dei satia kaba suk, hynrei u la pynpaw ba ka NPP kan poi beit sha ka jingjop ha kane ka elekshon.
Shuh shuh haba kre nbad ka No Objection Certificate (NOC) na ka skul bah North Eastern Hill University (NEHU), u Dr. Nonglait u la ong ba ka Executive Council jong ka skulbah ka la dep rai ban ai ïa ka jingbit ïa u bad ïa uwei pat u kyrtong.
Tangba u ong pat ba dei tad ynda la mih ka rai jong ka jingïalang NEHU kan sa pyllait ïa ka NOC sha u.
