Mawkyrwat, ‘Nailur 18: Hadien ba u transformer u la duh noh, ka shnong Rangblang Sasniang bad ka Shnong Lummawsiang ki la shong dum la bun bun bnai, wat la ki rangbah shnong ki la pyrshang ban ïa kren hapoh ka ophis treikam jong ka MePDCL, Mawkyrwat Division ban pynïoh ka u transformer ba thymmai namar ka shnong ka donkam eh ban buh noh da uwei pat, hynrei ka jingiakren kam shem la seisoh ei ei wat la ki la pyrshang bun bun sien.
Namarkata, ki nongshong shnong jong ki ar shnong ka Rangblang – Sasniang bad ka Lummawsiang ki la kyrpad ïa ka National People’s Party (NPP) jong ka Area Rangblang ba kan pynsngew lem ïa ka jingeh jong ka shnong sha ki bor sorkar namar kum ki shnong ki la mat ïa kane ka jingeh.
Kumta, khlem pynslem u bah Johnmilton Lyngdoh Marshilong, State Secretary jong ka NPYF u la ïalam ïa ki rangbah shnong ban leit buh jingthoh sha u Abu Taher Mondal u Myntri ba peit ïa ka Community & Rural Development Department Power Department, Taxation Department, ban leit pynsngew ïa ka jingdonkam jong ka shnong ka Rangblang – Sasniang bad ka Lummawsiang haba ia dei bad ka bording, mar kumta hi khlem pynslem u Abu Taher Mondal u la pynïoh ïa u transformer uba thymmai.
Ha kaba ïa dei bad katei ka bynta, mynta ka sngi ka 18 tarik u ‘Nailur, 2024 ki nongshong shnong jong ka shnong ka Rangblang – Sasniang bad ka Lummawsiang ki la pynpaw ka jingsngewnguh ïa u Abu Taher Mondal bad ïa u bah Johnmilton Lyngdoh Marshilong uba dei u State Secretary jong ka NPYF kiba la sngap ïa ka jingkyrpad jong ki nongshong shnong bad kiba la pynïoh mardor ïa u u transformer khamtam mynta lei lei ka la jan ka eksam jong ki khynnah skul bad ki samla kiba dang pule.
U bah Johnmilton Lyngdoh Marshilong, State Secretary ka NPYF u la kyrpad ruh ïa ka sorkar lem ïa ka tnad MePDCL ba kin pynkloi ban shna ïa ka jingker na ka bynta u transformer namar une u transformer u don ha syndah bad ka ïing skul bad khnang ba kan nym buh jingma ïa ki khynnah skul.
