Sngewkhia u Myntri sorkar bym treh ïadon bynta ki artylli ki party ha ka All Party Meeting ka sorkar

Shillong, Jymmang 09: U Nongïalam ka United Democratic Party (UDP) bad uba dei ruh u Myntri Sorkar u Bah Paul Lyngdoh ha ka sngi Thohdieng ula pynpaw ïa ka jingsngewkhia ïa ka rai jong ki seng saiñ pyrthei ba don ha ka Liang Pyrshah ba kan ym ïadonbynta ha ka All Party Committee kaba thmu ban shong bishar ïa ka jingtyrwa ban pyntreikam ïa ka project lynti rel ha Jylla.
Kane ka jingkynthoh jong u ka la mih hadien ba ka Congress bad ka Voice of the People’s Party (VPP), ki la pynbna ïa ki rai jong ki ba kin ym ïashimbynta ha ka jingïalang ban wan jong ka All Party Committee kaba la thaw da ka Sorkar Jylla.
U la ong, “Kane ka dei ka kam kaba khia haduh katta katta bad kaba ju ïakren na ka por sha ka por bad ngi sngew ba ka All Party Committee kan dei ka rynsan kaba biang eh naba yn ïoh ban ïohsngew ïa baroh ki jingai jingmut, ki jingkynthoh ba pyrshah bad ki jingkynthoh bym shah liang.”
Haba kren sha ki lad pathai khubor u la ong, “Hynrei lada mih kum kane ka rai ngam tip shuh ka mut ba kine ki jingpyrshang kin pulom bad ngin dang ïaibteng ban don ha ka jingbym lah batai.”