NEW DELHI, Jymmang 10: U khlur ïalehkai kriket ba pawnam jong ka India u Virat Kohli u lah ban shongthait noh na ka jingïalehkai Test cricket, katkum ki jingtip na ki tyllong khubor namar ba la ïathuh ba u la pyntip ïa katei ka jingthmu sha ka Board of Control for Cricket in India (BCCI).
Kane ka khubor ka mih tang hadien ar sngi ba u nongtied ba kynsai bad u paralok ba la slem jong u – u Rohit Sharma ula pynbna ba un shongthait noh na ka jingïalehkai Test bad tang shibnai tam shuwa ba ka India kan sdang ïa ka jingïakhun jong ka ICC World Test Championship 2025-27 pyrshah ïa ka England na bynta san tylli ki jingïalehkai Series, ka ban sdang na Headingley naduh ka 20 tarik u Jylliew.
Katkum ki tyllong khubor, u Virat u la don kum kine ki jingïakren bad ka Board ha kine ki bnai. Lada u Virat u shongthait shisha, kan long ka jingkut jong ka jingïalehkai Test kaba la neh 14 snem, ha kaba u la kamai 9,230 ron ha ki 123 tylli ki Test ha ka average kaba 46.85, ryngkat bad 30 tylli ki spah ron. U dei ruh u kapten Test ba bun tam ki nam jop jong ka India haduh mynta, ha kaba u la jop 40 tylli na ki 68 tylli ki Test kum u kapten.
Ha u snem 2016-2019, u Virat u la ïoh mad ïa kawei na ki samoi ba seisoh tam (prime) ha ka histori jong kane ka rukom ïalehkai kriket kaba jrong tam, da kaba kamai 4,208 ron ha ki 43 tylli ki Test ha ka average kaba 66.79, kiba kynthup ïa 16 tylli ki spah ron bad 10 tylli ki san phew ron (fifty) ha ki 69 tylli ki innings, kaba la pynlong ïa u kum uwei na ki nongïalehkai ba kamai bun ron tam ha kane ka format.
Hynrei ka phew snem jong u 2020 kam shym la long kaba seisoh na ka bynta une u nongtied ba kynsai, ha kaba u la kamai tang 2,028 ron ha ki 39 tylli ki jingïalehkai Test ha ka average kaba duna bha kaba long 30.72, da kaba kamai tang lai tylli ki spah ron bad 9 tylli ki sanphew ha ki 69 tylli ki Inning. Ki jingkheiñ jong u ki la kiew da ka jinglehkai kaba seisoh ha u snem 2023, ha kaba u la kamai 671 ron ha ki 8 tylli ki test ha ka average kaba 55.91, da kaba kamai ar tylli ki spah ron bad ar tylli ki sanphew ha ki 12 tylli ki inning.
U la pynkut ïa u snem ba la dep da kaba kamai tang 382 ron ha ki 10 tylli ki Test ha ka jingkheiñ kaba duna da 22.47, bad tang kawei ka spah bad sanphew ron ha ki 19 tylli ki inning. Ka jingïalehkai Test ba khatduh jong u ka dei ka Border-Gavaskar Trophy sha Australia naduh u bnai Naiwieng-Kyllalyngkot, ha kaba u la kamai tang 190 ron ha ki 9 tylli ki inning bad ka average kaba 23.75 bad ka spah ron jong u ha Perth ka dei kaba nyngkong eh jong u naduh u Naitung 2023.
Kumjuh ruh, um pat lah ban ïoh ïa ka spah ron ha la ïing naduh ka spah ron kaba u ka la kamai ha ka jingïakhun pyrshah ïa ka Australia ha kaba sdang jong u snem 2023 ha ka Border-Gavaskar Trophy ha Ahmedabad.
Wat hapdeng ka jinghiar jong ka rukom ïalehkai jong u, hynrei la sngewthuh ba ki nongpynïaid ïa ka kynhun bad ki nongjied ki kwah ïa ka jingshemphang jong u na ka bynta ka jingïalehkai sha England, ha kaba ka India kan mih madan hapoh ka jingïalam jong u kapten ba thymmai hadien ba u Rohit u la pynbna ba un shongthait noh.
Nalor u Rohit, u Ravichandran Ashwin u la pynbna ban shongthait noh na ka jingïalehkai kriket bar ri ha u snem ba la dep hapdeng ka jingïakhun pyrshah ïa ka Australia.
Ha ka jingïalehkai sha England ha u snem 2021, u Virat u la kamai 249 ron ha ki 5 tylli ki jingïalehkai ha ka average kaba 27.66, da kaba kamai ar tylli ki sanphew ron (fifty) ha ki 9 tylli ki inning. U Virat, ula mih madan ha ki 17 tylli ki Test ha England, ha kaba u la kamai 1,096 ron ha ka average kaba 33.21, ha kaba u la kamai ar tylli ki spah ron bad san tylli ki sanphew ha ki 33 tylli ki inning bad ka ron kaba bha tam ka long 149 ron.
