Shilllong, Rymphang 19: Ki nongïalam jong ki balang Khristan na ki jaka bapher ha Assam bad ka thaiñ lam-mihngi ha ka sngi Thohdieng ki la ïakynduh lang ha Guwahati da ka jingïakut ïa ka jingïalong kawei hapdeng jong ki bad kito baroh kiba shah lehbeiñ.
Ha kane ka jingïalang la ïakren ïa kiba bun bah ki mat kiba ktah ïa ki paid riewngeit Khristan ha kylleng ki bynta ka ri India.
“Ka jingïalang ka la pyn kynmaw ïa ki jingjia pyrshah ïa ki Khristan ha ka ri jong ngi ki ba kynthup ïa ki kyntien-jingshun, ki jingshah ibeiñ bad jingshah leh jubor jong ki riewngeit shimet bad ki kynhun kaba kynthup ruh ïa ki jingpynjot bad jingpynjah burom ïa ki jingtei bad ki jaka mane Blei. Ki kam sniew kum ka jingpynïap ïa u Graham Staines ha Odisha kumba 20-snem tam mynta, ki jingjia ba shyrkhei pyrshah ïa ki Khristan ha Kandhamal ha u snem 2008 bad kiba bun kiwei pat ha ki jaka bapher ha ka ri khamtam ha kito ki jylla ha kiba ki bor synshar ki sngap jarjar kum kiba ai jingmynjur pynban ïa ki nongleh kam bymman,” ong ka kyrwoh na u Rev Dr EH Kharkongor, Recording Secretary jong kane ka jingilang.
“Ha kine ki khyndiat snem kine ki kam pyrshah ïa ki Khristan ki la nang kham jur eh bad kham bun ruh, bad dang shen ka don ka jinglum kyrteng ïa ki Khristan shimet, ki longïing jong ki bad ki kynhun Khristan ha ka jylla Assam. Da kaba ai daw ban beh ïa kiba wan buhai shnong ha ki khlaw Sorkar, ka la don ka jingpynjot ïa ki ïingmane bad ki jaka shong briew ha kaba da ki spah ki nongshong shnong na ka jaidbynriew Boro kiba long ki trai shnong trai muluk, ki la kylla long ki phetwir ha la ka jong ka jaka. Ha kajuh ka por pat ym lah khlem da bishar ïa ka jing-ai noh da ki spah acre ki jaka bad spah khyndew sha ki briew bad kynhun hehspah kiba long nongwei ha kane ka thaiñ jong ngi. Kane ka long ka jingkhniot beiñ ïa ka ïoh ka kot jong ki kynhun bynriew kiba ritpaid bad tlot bor da kiwei pat kiba khlaiñ bor bad kiba ïaleh ban ïai bat ïa kata ka bor jong ki ha ki katto katne ki jaka ba donkam. La don ruh ka jingpynsngew sheptieng da ka jingbyrngem ban weng noh ïa ka hok jong ka Scheduled Tribe na ka bynta ki Khristan ka ban long ka jingpynduh noh ïa ka hok jong ki nongshong shnong tynrai jong ka ri kat kum ka Riti Synshar jong ka Ri India,” bynrap ka kyrwoh.
Shuh shuh ka kyrwoh na u Rev Dr EH Kharkongor ka la ong ba katba ki bor sorkar ki la kyntait ïa ka jingdonkti jong ka sorkar ban tuklar halor ka jingjied jong ki briew shimet ïa la ka jingngeit, ka niam bad jingmane Blei, pynban ki Balang bad ki kynhun Khristan ki dang ïai ïakynduh ïa kine ki jingdawa bad jingmaham na ka por sha ka por.
“Ki jaidbynriew ha kane ka thaiñ lam-mihngi ki lah ju don ka jingburom ïa ka jingjied shimet jong ki briew ïa ka jingngeit niam bad kiwei de ki dustur rukom im, bad kim juh tuklar ïa ka rukom im jong kiwei pat ha ki bynta bapher jong ka ri India. Ki kam sniew kum ka jingpynïap briew bad ki jingleh beiñ kim juh don ha ka rukom im jong ngi. Ki rukom pynjot da ka bor bad ki jingkyndang jubor ki long tang ki atiar jong ka jingleh niewbeiñ bad ka jingkhaweit,” ong ka kyrwoh.
“Ha ka jingjied nongmihkhmat kiba long mynta u bnai ha Tripura, Nagaland bad Meghalaya, kane ka jingïalang ka khot ïa baroh ki nongshong shnong ban long kiba phikir bad peitngor halor ki jingbyrngem ban pynduh ïa ki jinglaitluid kiba ka Riti Synshar jong ka Ri Inda ka ai na ka bynta baroh ha ka Ri. Kane ka jingïalang ka khot ruh ïa ki para Khristan ban ym kylla-dien na ki jinghikai ban bat ïa ka jingshisha, ka hok bad ka jingleh hok khlem jingpynïapher. Ym dei ban shah pynbiej ha ki jingkular bad jingai-sngewbha kiba tang shiteng por. Kum ki nongthep vote ngi dei ban sngewthuh ïa ka jingkordor jong kane ka bynta, bad da kaba bishar bha bad ka jingïatiplem kaba khuid ngi dei ban jied ïa ki briew kiba don ka jinglah, kiba bat ïa ka hok, kiba isih ïa ka jingbamsap, kiba don ka jingshaniah bad ka jingaiti na ka bynta ka jingïalong kawei bad ka jingbha jong ka imlang sahlang, ka jaidbynriew jong ngi bad ka Ri baroh kawei,” ong shuh shuh ka kyrwoh na u Rev Dr EH Kharkongor, Recording Secretary.
Ki nongïalam kiba la ïashimbynta ha kane ka jingïalang ki dei na ka National Boro Christian Council (NBCC), Assam Baptist Convention (ABC), Boro Baptist Church Association (BBCA), Karbi Anglong Baptist Convention (KABC), All Manipur Christian Organisation (AMCO), Catholic Church, UCF Karbi Anglong, Nagaland Joint Christian Forum (NJCF), North Bank Baptist Christian Association (NBBCA), Khasi Jaiñtia Christian Leaders Forum (KJCLF), Christ Church Guwahati (CNI), Assam Christian Forum (ACF), CCFNEI, Boro Baptist Convention (BBC), ïathuh u Rev Dr EH Kharkongor.
