Balei u CM u plie ïa ka PA Sangma Stadium haba ym pat dep pyntrei buh jingkylli ka BJP

Shillong, Rymphang 19: U National General Secretary ka BJP, u Rituraj Sinha ha ka sngi U Blei u la buh jingkylli ïa ka sorkar bad ïa u Myntri Rangbah ka jylla halor ka jingleit ban khap ribon jong u ïa ka PA Sangma Stadium ha Tura namar ka jingpyntrei ïa kane ka projek kam pat shym la lah ban pyndep satia.
Haba ïa kren bad ki lad pathai khubor u Sinha u la buh jingkylli ba kumno ka sorkar kam ai jingbit ïa u Myntri Rngbahduh ka ri u Narendra Modi ba un wan ban pynlong ïa ka jingïalang paidbah ha PA Sangma Stadium, Tura, West Garo Hills District.
“Ngi la ïoh ka shithi kaba pyntip ïa ngi kumne, Ka raly u Modi ha PA Sangma Stadium ngim lah satia ban ai jingbit namar kane ka projek ym pat dep pyntrei satia,” ïathuh u Sinha.
“Balei ym shym la ai jingbit ïa ngi ban pynlong ïa kane ka raly da kaba ai daw ba ym pat dep pyntrei haba u Myntri Rangbah ka jylla u Conrad K Sangma u la dep plie ïa kane ka Stadium ryngkat ka rong ka taw naduh ka 16 Nohprah 2022 katba ynda ngi pan jingbit ban pynlong raly hadien arbnai pat la aidaw ba ym pat pyndep satia,” u la ong.
U la ïathuh ba na ka liang ka party ka la dep ban pan jingbit ïa kane ka raly na u District Sports Officer bad ki bor ba dei peit hynrei la kyntait pat ban ai jingbit. U la ong ruh ba na ka liang ka party kam pat ïoh jingtip kaba thikna ïa ka jingdonkti u Conrad ban nym ai jingbit ïa kane ka raly.
Kat kum ka jingïathuh u Sinha ba dei ka tnat ki kam lehkai kaba la pyntip ba ïa ka jingpyntrei ïa kane ka Stadium ym pat shym la lah satia ban pyndep.
Shuh shuh u la ïathuh ba ka PA Sangma Stadium ka dei ka projek kaba la mang ha ka jinglut kaba 127 klur ha kaba 90% ka dei ka pisa kaba la wan na ka sorkar pdeng.
U Sinha u la ong ba kane ka jingkhanglad ka tnat ïalehkai ka sorkar Meghalaya ïa u Modi ban pynlong jingïalang hapoh kane ka Stadium ka paw shai ba ka sorkar MDA ha ka jingïalam ka NPP ka shep tieng ïa ka jingwan ïalap ilekshon u Modi ha Tura kaba dei ruh ka Constituency u Myntri Rangbah ka jylla.
U la ong ba ki paidbah ka thaiñ Garo Hills bad ka jylla Meghalaya baroh kawei ki don ka hok ban ïohsngew ïa kaei kaba u Modi u don ban kren sha ki paidbah namar mynta ka kynti ki paidbah ka jylla ki phai khmat sha ka BJP ha ka jingïalam u Modi.
“Lada ki paidbah ka Meghalaya bad ka ri India baroh kawei ki angnud ban ïohi ne ïoh sngew ïa kaei kaba u Modi u don ban kren, ym don bor hapoh kane ka pyrthei ban khanglad bad u Modi un wan ïalap elekshon beit, la kadei ha Garo Hills ne ha Shillong ne ha kano kano ka thaiñ jong ka jylla” u la ong.
Shuh shuh u la kynnoh ruh ba ka don ka jingtieng jingsyier na ki seng saiñ pyrthei baroh ïa ka BJP namar ki ïohi ba ki paidbah ka jylla ki la pahi khamt sha ka BJP bad u Modi.
“Hato ki party ba hap ban ïakhun pyrshah ïa ngi ki tieng eh balei bad balei ba u Conrad Sangma bad u Mukul Sangma ki tieng eh ïa ngi? Ngi dei ban sngewthuh ka jingtieng jong ki ka dei namar u Modi un rat dyngkhong ïa ka bamsap baroh bad ki paidbah ruh ki la pyni ïa ka mon ban snoh kti lang bad u Modi,” u la ong.
U la ong ruh ba ki seng riewlum ha ka jylla ha kane ka kynrti ki la kyndit thret ban ïohi ba ki paidbah ka jylla ki la ai jingkyrshan pura ban wanrah ïa ka sorkar BJP ha ka jylla.
“Balei nga ong kumne namar ha kine ki ar sngi kiba la dep u Myntri kam poh iing ka sorkar pdeng u Amit Shah u la wan ban ïalap elekshon na bynta ka party bad ki paidbah da ki bun bun hajar ki la mih ban sngap bad ruh ban ai jingkyrshan ïa ka BJP kaba long markhongpong ïa kaei kaba kiwei ki party ki pyrkhat ha kaba sdang.
Shuh shuh u la ong ba ki paidbah ka jylla ha kane ka kynti kaba mynta kin ym pynsepei ïa ka vote jong ki ban kyrshan ïa ka TMC namar ka wan shane ban shu wan shangkai saiñ pyrthei sha ka jylla,
Haba pynphai nia ïa ka jingkynthoh u National General Secretary ka TMC u Sinha u la ong ba ka dei ka jingkren biria suda jong u bad, ‘ki paidbah ki dei ruh ban tip ba la ju tip ïa u Abhishek Banerjee kum u nongïalam ka kam bamsap ha West Bengal,” u la ong.
“Namarkata u dei ban peit shuwa ïa lade namar u dei u nongïalam ba shyrkhei tam ka bamsap,” u la bynrap.
Haba kylli halor ka jingweng noh ka sorkar jylla na ka thup ki jylla ba ka CBI kan lah ban wan tohkit ïa ki kam bamsap u Sinha u la ong, “ U Amit Shah u la kular ba lada ka wan ka BJP ha ka bor ngin sa thung ïa ka Special Task Force ban khlieh da u nongbishar ba la shongthait ka Supreme Court ba un tohkit ïa ki jingkynnoh bamsap jong kaen ak sorkar ba mynta bad ki sorkar kiba la leit ruh khnang ba ngin lah ban pynshitom ïa kito baroh kiba donkti ha ki kam bamsap.”
Haba kylli halor ka jingsnoh rdin ka BJP ha ka sorkar MDA wat la da ka la kynoh ba ka don ka jingbamsap kaba shyrkhei ha ka sorkar u Sinha u la jubab, “ka jingbym weng ka BJP ka dei namar ngi kwah ban pynthikna ba ki sorkar jylla ha kane ka thaiñ kin ïoh bun ki kam pynroi da ka jingdon ka BJP.”