Kem ki Pulit 4 ngut ki suba nongkhaïi drok, kurup 23 tylli ki mobile phone tuh

Shillong, Rymphang, 19: Saw ngut ki suba nongkhaïi drok ki la shah kem ha ki Pulit jong ka East Khasi Hills bad ïoh kurup haduh 9.65 gram u drok heroin lem bad 23 tylli ki mobile phone ïa kiba la suba ba ki dei ki mobile tuh.
U Superintendent of Police ka East Khasi Hills u MGR Kumar ula pyntip ba ka kynhun ki Pulit hapoh ka jingïalam jong u SDPO ka Sadar ha ka sngi Thohdieng ryngkat bad ki Pulit ka Special Cell, ki la pynlong ïa ka jingkhynra ha kylleng ki jaka ka nongbah Shillong kaba neh haduh ka step kaba bud bad ha kane ka jingkhynra ki la ïoh kem haduh 4 ngut ki briew kiba la suba jur ba ki dei ki nongkhaii drok.
Ha ka jingkhynra, ki Pulit ki la ïoh kurup shi synduk sabon u drok heroin ba uba khia 9.65 gram, 84 tylli ki tyndong plastic barit, 26 tylli ki thyrnia injek, bad 14 tylli ki tin golden ba thylli bad ka pisa T. 5920 hajar.
Ka jingtohkit ka dang ïaid shakhmat ban lap dien ïa kiba donkti bad u la pyntip ruh ba ïa ki mobile phone yn sa pynphai noh sha ki trai ynda la pyndep katkum ki jingdonkam jongka aiñ.
Ki Pulit ka Pynurlsa Police Station, kila kem ïa uwei u Nongtrei ka State Bank of India (SBI) Pynursla Branch, halor ka jingkynnoh donkti ban rong tuh ïa ka pisa ba kot haduh T. 95 lak na ka Bank.
U SP u la pyntip ba ki Pulit jong ka Pynursla ki la ïoh pdiang ïa ka ejahar ha ka 17 tarik mynta u bnai na u Branch Manager jong ka SBI Pynursla ba uwei u nongtrei u la rong tuh ïa ka pisa kaba kot T. 95 lak na ka Bank ha ka 13 tarik mynta u bnai.
Ïa kane la kam la bynshet ha u SDPO ka Sardar ban thwet ïa une u briew bad da ka jingïarap jong ki bahaiing hasem, ki Pulit ki la ïoh kem ïa une u briew ha ka sngi U Blei.
Ha ka jingtohkit la lap ba une u nongtrei u la pyndonkam bakla ïa u password ba la ai sha u da ki bor pynïaid jong ka Bank bad u la phla ba u la tuh ïa kane ka pisa la katto katne bnai mynta bad u la pynlut ïa ka pisa ha ka jingïathong khalai Online.