Ïaid Flag March ki Pulit ha West Shillong hadien ka huri hura ki dkhot ka NPP bad UDP

Shillong, Rymphang, 19: Ki bor jong ka aiñ ki la hap ban pyni ïa la ka jong ka iktiar ha kane ka kynti shwa ba ka Jylla Meghlaaya kan leit sha ka elekshon ban jied ïa ki nongmihkhmat ba thymmai jong ka Iingdorbar Thawaiñ ka jylla ka ban sa long shen hadien ba la ka mih ka jingïakynad hapdeng ki nongthep vote ha West Shillong Constituency bad ha Phulbari Constituency ha kine ki khyndiat sngi bad khyndiat taiew ba la leit noh.
Kan dei ruh ka sien banyngkong eh ha ka histori jong ka Meghalaya ba ki bor Pulit kin pynlong da ka jingïaid Flag March shwa ban pynlong ïa ka elekshon.
Tang hapoh lai sngi ba ka la mih ka jingïashoh ïadat hapdeng ki nongkyrshan ka National People’s Party (NPP) bad ka United Democratic Party (UDP) ha West Shillong Constituency ki Pulit ki la ïaid Flag March ha ki shnong kiba hap hapoh ka West Shillong Constituency ban pyni ïa ka jingkhlaiñ bor jong ka aiñ khnang ban pyndem ïa kiba thmu ban pynthud ïa ka shongsuk shongsaiñ ha kum kane ka por.
Ha ka miet jong ka 15 tarik, mynta u bnai, ka Kong Antonette Sohtun ka la mudui da ka ejahar sha ki Pulit jong Jhalupara Out Post da kaba kynnoh ba u kyrtong ka NPP u Bah Mahendro Rapsang bad ki nongbud jong u, ki la wan kyndar ïa ka ing sah jong ka ha Lumphyrnai, Mawbah ban thwet ïa u kurim jong ka u Bah Droshing Lyngdoh bad ha kane ka miet ka mih ka jinghuri hura kaba jur bha ha kane ka shnong.
Hynrei tang shi sngi hadien ka jingsaphriang jong ka video ba la mih ka jingïahuri hura hapdeng ki nongkyrshan ka NPP bad ka UDP, u Vice President jong ka NPP West Shillong Constituency u Bah Rishan Nongsiej u la shah shoh ha ki katto katne ngut ki briew, kiba u la kynnoh ba ki dei ki nongkyrshan jong ka UDP, katba u dang wan phai na ka jingïalang ïalap elekshon ha Lama Villa ha lynti ban leit phai noh sha la iing ynda poi hajan ka Kamber Clinic kaba don marpyrshah bad ka khyrdop jong ka Khasi Hills Autonomous District Council.
Ki Pulit ha kane ka miet ki la kem noh ïa ki arngut ki briew kiba la suba ba ki dei kiba donkti ban shoh pynmynsaw ïa u Bah Nongsiej.
U Chief Electoral Officer jong ka Jylla u Bah F.R Kharkongor ha ka sngi U Blei u la pyntip ba ki Pulit haduh mynta ki la ïohkem 46 ngut ki briew kiba donkti ha ka jingïahuri hura ha ki ar tylli ki jingjia ha Phulbari Constituency bad ïa u nongïalam ba la suba ban thaw jingkulmar yn sei haduh ka 3 tarik, Lber.
U pyntip ruh ba 142 ngut ki briew ki la shah pynkohnguh ha ka Iingkashari hapoh ka Section 107 jong ka Indian Penal Code (IPC).
Kum ban shu pynkynmaw hangne, ha Phulbari Constituency, ki Pulit dang shen ki la ïaid Flag March hadien ba la mih ka jinghuri hura hapdeng ki nongkyrshan jong ka All India Trinamool Congress (AITC) bad ka National People’s Party (NPP), ha ka miet 7 tarik mynta u bnai hapoh ka shnong Charbatapara.
Halor kane ka jingjia, haduh 31 ngut ki briew ki la shah kem. Ka ophis District Election Officer ka la pyntip ba ka jingkulmar ka la mih hadien ba ki nongkyrshan jong ka AITC ki la tynrah ïa ka kali Scorpio jong u MDC ka NPP u Habibur Zaman uba la ïaid lyngba na ka shnong Charbatapara, West Garo Hills.
Haba ïadei bad kane ki Pulit jong ka West Garo Hills ki la phah soi ïa ka soskular haduh 125 ngut ki briew kiba la shah kynnoh donkti ban thaw jingkulmar bad ïa kine baroh la rah sha kashari na ka bynta ban phah soi ïa ka soskular.
Wat hadien kane ka jingjia, sa shisien pat ha ka sien kaba ar, ka jingïahuri hura ka la jia biang hapdeng ki nongkyrshan ka All India Trinamool Congress (AITC) bad ka National Peoples Party ha ka miet 15 tarik mynta u bnai ha Phulbari Constituency.
Kane ka huri hura ka la jia hakhmat ka iing sah jong u kyrtong ka TMC u Estamur Mominin tang namarba ka pynsawa ïa ka sur jingtem ha ka por 8 baje mynmiet, kaba la pyndik ïa ki marjan marpa bad ïa ki khun ki kti kiba dang pule kot ban pynkhreh ïa ki eksamin.
Arngut na ki nongmudui kiba la tip kyrteng kum u Md Joynal Abedin bad u Md Aynal Haque ki la shah tangon ha ki nongkyrshan ka TMC ba la ïalam da u Spofiqul Islam ba ju khot sin u Bhutto, uba dei u bahaiing jong u kyrtong ka TMC bad uba la bna nam kum u nongpynkulmar shnong.
Tang shu ïoh jingtip halor kane ka jingjia, ka kynhun Pulit ka Phulbari Police Station ba la ïalam da uSub Divisional Police Officer (SDPO) ka Dadenggre, ki la leit mar mar sha kane ka jaka bad shem kumba 150 ngut ki briew ki la ïalum shabar ka iingsah jong u Estamur bad lap ruh arngut ki briew kiba mynsaw kiba la batai ïa ki Pulit ba kumno ki shah shoh ha u Bhutto bad kiwei. Ki Pulit kila kem ïa u Bhutto, hynrei ki paidbah ki la kerkut ïa ki Pulit bad sdang ban thombor ïa ka kynhun Pulit ban ïoh pyllait ïa u Bhutto uba la phet krad na kane ka jaka. U Bhutto u dei uba donkti ha ka jingthombor ïa ki Nongkyrshan ka NPP ba jia ha ka 7 tarik Rymphang ha Charbatapara. Une u runar ula shah kem bad la shah teh kyndon ha ka Iingkashari.
Namar ka jingïohphet jong u Bhutto, ki Pulit ki la kem noh ïa uwei u briew uba donkti ban kynshoit ïa ki paidbah ban thombor ïa ki Pulit. Hynrei haba kane ka kynhun ka dang wan phai sha Police Station, ki nongkyrshan jong ka TMC ba la ïalam da ka kurim jong u Estamur ka Hasina Zaman, ki la ker kut ïa ka surok ha Bholarpita bad ki la pyllait ïa une u briew na ka kti jong ki Pulit.
Ki Pulit ha kaba khatduh ki la hap wan kit noh tang ïa ki arngut ki briew ba mynsaw sha Phulbari Hospital bad shem ruh ba ki dang don sa arngut ki briew ba mynsaw, kiba la wan hi dalade sha hospital ban wad jingsumar hadien ka jingshah shoh ha kane kajuh ka kynhun.
Kawei na kine kiba shah shoh ka dei ka khynnah Kynthei kaba la mynsaw ha ki kjat na ka jingshah shoh bad ïa kane ka khynnah la phah sha ki jaka sumar ba kham paka ban ïoh ïa ka jingsumar.
Ki Pulit ki la phah ïa ka kynhun na Rajabala bad Bholarbita Outpost sha Phulbari bad ka jingthwet ïa kine ki runar ba ïoh phet tuh, ka dang ïaid shakhmat.
Ki Pulit ki la ujor da ka ejahar pyrshah ïa kine ki briew bad kumjuh ruh kine kiba mynsaw ki la ujor ejahar da kaba jer kyrteng ruh haduh 32 ngut ki briew kiba donkti ban thombor ïa ki.