Kylla ka kali leit jingïaseng Ri Lyngngam Presbytery, khlad ar ngut ki nongrwai Choir

Nongstoiñ, Rymphang, 19: Ar ngut ki samla kynthei kiba dei ki dkhot jong ka kynhun rwai Choir jong ka Balang Presbyterian Umdang, West Khasi Hills, ki la khlad noh hadien ba ka kali kaba kit ïa ki lem bad kiwei pat ki para ba ïa rwai-lang, ka la kylla ha ka shnong Mawkhumkha ka jaka ba pynlong ïa ka jingïaseng Ri Lyngngam Presbytery. Kiba la khlad noh la tip kyrteng kum ka Dearly Daffudil Rashir 18 snem ka karta bad ka Sonamika Ryntong 17 snem ka karta.
Kane ka jingjia ka la jia ha ka step sngi u Blei ha ka por kumba 8:30 ei ei mynstep, ha kaba katei ka kali Bolero pick up kaba don ïa u number ML07 B 9110, ba la ñiah da u Shempatkupar Mawsor, ka la mih na Umdang ryngkat 34 ngut ki nongleit jingïaseng, kiba kham bun hi na ki, ki dei ki dkhot nongrwai Choir jong ka Balang Presbyterian Umdang.
Hynrei, ka long kaei kaei kaba sngewsih ba mar ïa poi ha katei ka jaka ha Mawkhumkha, katei ka kali ha ka jingbakla bad jingbym lah shuh ban teh lakam da u nongñiah, ka la leit tynrah ïa ka top um kaba don ha katei ka jaka bad kylla khongpong, haduh ban dkhat syndon ha kajuh ka jaka ïa ka mynsiem ba kordor jong kitei ki ar ngut ki samla kynthei.
Kiwei pat kiba don ha katei ka kali ki la mynsaw jur bha, ha kaba ki riew paidbah kiba don ha katei ka jaka, mar mar ki la ïarap ban pynkit mar mar sha ki jaka sumar kum ha Riangdo CHC bad Nongstoiñ Civil Hospital. Hynrei na ka bynta kito kiba la kham mynsaw jur eh la pynkit noh sha Shillong. La ong ruh ba ki don ar ngut kiba la kham mynsaw jur bad don hapdeng ka jingbym tip briew bad don mynta hapoh jingsumar ICU.
Hadien kane ka jingjia ba sngewsih, na ka liang ka jingïaseng Presbytery jong ka Ri Lyngngam, ha ka jingïaseng kaba nyngkong ka la pynlong noh tang ïa ka jingïaseng duwai bad kiba bun ki la mareh sha katei ka jaka ba jia ka jingjia kaba sngewsih ban ïarap ïa ki lanot.
Ha kajuh kane ka sngi bad ha kajuh ka por, ka la don ruh ka jingkylla kali ha shnong Nongsba Maweit, ha kaba kawei ka kali sumo kaba don ïa u number ML05 1251, kaba kit ïa ki nongleit jingïaseng ban leit sha ka jingïaseng Presbytery Nongpyndeng ha Balang Mawtynrong, ka la kylla bad wanrah ka jingmynsaw sha ki nongleit jingiaseng.
Katkum ka jingïathuh jong u Secretary shnong barim ka shnong Nongsba Bah Phiom Riangshiang, la ong ba shwa ba kane ka sumo ka la kiew ïa u thiep shwa ban poi ha Nongsba, hynrei la ong ba namar ka don ka jingthut ha ka break jong ka kali, kumta ka la kylla noh ha katei ka jaka,
“Donbok ba ha kane ka jingjia, ki 8 ngut ki riew kynthei, ki longkmie ka Balang kiba don hapoh ka kali, ki la shu mynsaw malu mala ha ki bynta jong ka met. Tangba hap pynpoi pat ïa ki sha jaka sumar ha PHC Maweit bad kumjuh ruh sha Nongstoiñ na ka bynta ki jingmynsaw. Katba ar ngut ki rangbah ba kynthup ïa u nongñiah ki khlem lei lei satia”, ong u Bah Riangshiang.