Ka NPP kan ïeng pyrshah beit ïa ka jingthmu pyntreikam ïa ka Uniform Civil Code
Ther u MR ïa ki seng ba thmu ban pharia ïa ka jylla
Shillong, Rymphang 19 : U National President ka National People’s Party (NPP) uba long ruh u Myntri Rangbah ka jylla, u Conrad Kongal Sangma u la khyrwit tyngeh ïa ki seng saiñpyrthei kiba thmu ban wanrah ka jingïapher jaidbynriew da ki jingkren pynbiej ha ki rynsan ïalap election, ha kaba u la pynthikna ba ka NPP kan ïeng pyrshah ïa ka jingthmu pyntreikam ïa ka Uniform Civil Code (UCC).
“Mynta ki kwah ban wanrah ïa ka Uniform Civil Code (UCC), ha kaba ka jingithuh ba kyrpang ïa ki riewlum bad ki rit paidbah yn sa duh noh, Nga kular ïa phi ba kan dei ka NPP ka ban ïeng pyrshah ban pynthikna ba ïa ka UCC yn nym shah ban pyntreikam ha kane ka Jylla bad ha ka thaiñ baroh kawei, ban ïada ïa ka jinglong kyrpang jong ngi ki paid riewlum bad jong ka Jylla,” ong u Myntyri Rangbah ka Jylla.
U la ong ba ki don ki seng saiñpyrthei kiba pyrshang ban wanrah ïa ka Citizenship Amendment Act (CAA) ha Meghalaya, bad dei ka NPP kaba nyngkong eh ban ïeng pyrshah ïa ka CAA ban pyntreikam ha kane ka Jylla bad ha ka thaiñ shatei lam mihngi.“Nga lap ba ki don ki seng saiñpyrthei kiba la pyrshang ban wanrah ka jingïapher jaidbynriew ban pharia ïa ka Jylla bad ïa ki paidbah,” u la ong bad buh jingkylli ruh hato yn ailad ïa kita ki seng ban leh kumta ? U la ong ba ka Jylla ka khlaiñ da ka jingïatylli lang, bad kane kadei ka thong jong ka NPP ban ïaid shakhmat, bad kaei kaba ki paidbah ki kwah mynta ka long ban ïoh ïa ka jingsynshar kaba skhem tang da kawei ka seng hadien 51 snem. “Nga lyngngoh ïa kiwei ki seng saiñpyrthei da ka thong aiu ki mih, nga ïohi ba ki don ki nongïalam na kiwei ki seng haba kren ha ki rynsan election ki kren pyrshah beit ïa ka Sorkar, haba ma ki hi ki don beit bad ngi ha ka Sorkar baroh 5 snem,” u la ong.““
U la ong shuh shuh ba ki don sa kiwei ki seng kiba wanrah ïa ka jingiapher jaidbynriew.Kito ki seng kiba pyrkhat ba ki lah ban phiah ïa ngi ki la bakla shibun, namar ngi don ka jingngeit kaba skhem ha ka jingïatylli bad ka jingïatreilang ban kyntiew ïa ka Jylla,” la ong u khliehduh ka NPP.