Ha ka kyrteng ki “Development” wan ki seng Ri-thor ban pynbiej paidbah ym ban ïada jaitbynriew: Metbah

Shillong, Rymphang 19 : Ka jingïalang jong ka United Democratic Party, Mairang circle kaba la pynlong ha ka sngi Saitjaiñ ha u Mot Tirot, Mairang ha ka jingthmu ban pan jingkyrshan biang sa shisien na ka bynta ban pynjop ïa u kyrtong ka seng, u bah Metbah Lyngdoh uba long u MLA ba mynta ka la long kaba shongshit namar ka jingshad kmen jong ki paidbah kiba la kot palat phew hajar ngut lyngba ki jingrwai kiba la thaw kyrpang bad ruh ban ïoh sngew ïa ki jingkren na ki nongkyrshan halor ka jingangud jongki na la u kyrtong.
Haba ai jingkren ha katei ka sngi, u bah Metbah Lyngdoh u la pynsngew halor ka jingsheptieng ka jong u ïa ki jingpynbiej jong ki seng na ri thor ïa ki paidbah ha ka kyrteng jong ka roi ka par lane ka development ym pat ban pynsngew ïa ki paidbah da ki lad jingïada ban pynneh pynsah ïa ka jinglong rit, hok tynrai jong ka Jaidbynriew Hynniewtrep.
“Ka ilekshon 2023 kadei ka ilekshon ka bapher bha. Nga sheptieng ba ïoh ki paidbah ki shah ïalam bakla ban jied kata ka dei na ka jingwan jong ki seng kiba pynbiej mynta ïa ki paidbah ha ka kyrteng ka roi ka par lane development ym ban don ka jingmut ban ïada ïa ka jaidbynriew rit paid,” ong u bah Metbah ha ka jingkren jong u sha ki paidbah kiba la kot palat phew hajar ngut.
Une u kyrtong ka UDP uba la jop na kane ka seng la lai sien kynthih bad uba long mynta kum u president rangbah ka UDP, u bah Metbah u ong, ka UDP ka ïeng ha ka nongrim ban ïada ïa ka jaitbynriew katba kiwei ki seng kiba ïakhun ïa ka elekshon khamtam kito kiba na shabar ka jylla ka long beit tang ban kyrñiom lyngba ka development.
U bah Metbah u la pynsngew ruh ïa kawei ka sur, kaba u la ong, katne ki snem ki la ïaid, ngi la shu mad tang ki jingjynjar namar ba ngi la shu shah pynbiej tang ha ka kyrteng ka development.
U bah Metbah uba don ka jingïakhun pyrshah ïa u kyrtong ka seng na ri thor, ka Congress, u la phla ruh sha ki paidbah ba ha kine ki por kiba ladep, ki ladon bun ki seng kiba dei ki national party kiba la pynbiej ïa u ban pynïasoh bad ki bad bynrap da kaba ong, ba u la kyntait ïa ka jingtyrwa bad rai ban ïaineh ha kawei ka seng bad ka nongrim jong ka ban ïada ïa la ka jong ka jaidbynriew.
Nalorkata, u la ong ba ki paidbah kim dei ban duh mynsiem halor ka roi ka par namar ka roi ka par kan wan beit namar ki skhim pynroi ki la don lypa kiba dei ki hok jong ki paidbah hynrei donkam tang ïa ki paidbah ban ailad ïa ka UDP ba kan don ha ka bor bad u angnud ba kiwei ruh ki kyrtong ka seng kin jop lang ha kane ka elekshon khnang ban lah ban thaw sorkar na ka bynta kiba bun ki kam kiba kum ka seng trai ri ka dei ban leh.
Ha kawei ka liang, kawei ka samla kaba dei ka General Secretary ka Nongliput Unit, ka kong Airisha Mawlong ka la ong, ba ka politiks ka long kum ka kam shongkha shongman namar shisien ba ngi la bakla ban jied, ngin bakla shi rta jingim bad kit bad bah ïa ki jingeh shi junom.
Ka la ong ruh ba lada ngi jied ia u briew uba don ka jingkitkhlieh, ngim duh jingkyrmen ba ka lawei jong ngi kan bha.
Ha kajuh ka por ka la kyntu ïa ki paidbah ba kim dei ban dang ailad ïa ki seng kiba na shabar namar ki ladep ban knieh ïa ka hok jong ki trai ri bad ka don ka jingma ïa ka jaitbynriew rit paid na ka daw ba kine ki seng ki don ïa ka thong ban pynrem ïa ki seng riewlum, la bynrap ka kong Airisha.
Haba kren ban pan jingkyrshan na ki paidbah ïa u bah Metbah Lyngdoh, ka kong Airisha ka la ong, haba une u nongmihkhmat u la pynïoh distrik, hato ngin siew kylliang da kaba sniew bad haba u la leh bha, ka dei ka kamram jong ki paidbah ban ai jingkyrshan lyngba ki vote jongphi kum ka dak ka jingsngew nguh.
Shuh shuh, ka kong Airisha ka la kyrpad na u bah Metbah ba lada ka UDP ka wan ha ka bor, ka dei ban pynkylla ïa ka reservation policy namar ki samla ki jynjar bad lynniar ba ki mad bun ki jingeh na ka jingnoh shilliang palat ka policy.
Kiwei kiba la ai jingkren ha katei ka sngi ki kynthup ïa u bah Marshal Diengdoh u nongïalam barim ka NPP, ka kong Madonna Langstieh ka nongïalam ka seng Congress bad kine ruh ki la pan ïa ka jingkyrshan na u paidbah ba kidei ban pynjop biang ïa u bah Metbah namar ki ruh ki ïohi ïa une u nongïalam kum u rangbah uba ïohi jngai ïa ka lawei ki paidbah.