Sieh jubor ka Assam da u mawnongrim ha Jatalong, Block-II, da ka jingbitar pynpra ki paidbah

Nongpoh, Naiwieng, 12 : Uwei u Mawnongrim ba la wan buh da ka Assam ban tei ïa ka I.B ka tnad Forest ha Jatalong ba hap ha Raid Nongtumg ha Ri Bhoi u la shah pynpra noh ha ki paidbah, kaba dei halor ka nongrim ba la wan buh jubor ïa utei u Mawnongrim khlem da tip ka bor shnong bad ki paidbah Nongshong Shnong.
Ki paidbah ka shnong Jatalong ki la pynpra noh ïa utei u mawnongrim ha ka miet sngi Saitjaiñ hadien ba la wan buh ïa u Mawnongrim da u Dr. Tuliram Ronghang, CEM ka KAAC ha ryngkat ka jigndon lang u Horensing Bey, MP bad u Rupsing Teron, MLA, U Avijit Kro, u member ka MAC ka KAAC lem bad kiwei ki ophisar sorkar ka Assam na ka tnad Forest.
Kumba la ioh lum jingtip, la ong ba ki paidbah ki la bitar halor kane ka jingleh donbor ka sorkar Assam lyngba ka Karbi Anglong Autonomous Council kiba la wan ban buh ïa u mawnongrim khlem da tip ka bor shnong bad ki paidbah bad dei halor kane ka nongrim ki paidbah da ka jingbitar ki la mih ban pynpra tang hadein katei ka sngi ba la wan buh ïa u Mawnongrim.
Kumba la pynpaw da ki nongïalam shnong ki la kynnthoh ruh kumno ka sorkar Assam ka lah ban wan rah ïa ki kam pynroi haba ïa ka jingïapynbeit pud ka dang ïaid mynta bad kaei kaba la pynbitar ïa ki paidbah ruh ka dei namar ba ka Assa ka ioh lad ban wan rah ïa ki kam pynroi bad katba ki kam pynroi ba wan na Meghalaya pat ki shah khanglad ha ka Assam. Halor kane ka nongrim kim ailad ban wan ki kam pynroi na ka Assam katba ym pat lah ban pynbeit ïa u pud u sam bad lada shah ïa ki kam pynroi na Assam ki kam pynroi na ka sorkar Meghalaya ruh ki dei ban ioh lad ban wan sha kitei ki shnong, la pynpaw ki nongïalam Shnong bad ki riew rangbah.