Shillong, Naiwieng 3 : U nongïalam ka UDP u bah Bindo M Lanong ula pynpaw ka jingsngew pyrshah halor ka jingai daw jongka tnad Election jongka jylla ïa ka jingshah ujor u bah Dasakhiat Lamare ha kaba la kynnoh ba u sam pisa sha ki paidbah ka Nongkrem Constituency da kaba katei ka tnad ka la ong ba ym lah ban leh ei ei namar ka Model Code of Conduct kam pat treikam.
“ Nga la ïoh jingtip ba ka nongrim ba ka tnad Election ka ai ka long ba ym pat treikam ka Model Code of Conduct ym lah ban leh ei ei, kane ka pynpaw ba katei ka tnad kam lah ban leh ei ei? Ngam sngewmynjur ïa kane bad ym don hi ruh ba sngew ïahap bad katei ka jingaidaw” ong u bah Bindo.
“ Ha kaba ïadei bad ka Model Code of Conduct hap ban ïa bishar bniah. Mynta hashwa ka election la pynbna ïa ka Model Code of Conduct kata tang shu la pynbna ïa ka tarik. Hato kane ka mut ba lah ban leh ïa ki kam runar mynta bad sa sangeh pat tang shu la pynbna ïaka Model Code of Conduct:? Hato kane ka mut ba yn shah beit ïa u briew uba lah ban thied ïa ki briew bad kadiang bad ka mon bad haba shit haba shai. Hato shah sieh ïa kane? Nga tharai ka tnad election ka bakla halor kane” ong u bah Bindo.
Ha u bnai ba la dep u CEO ka jylla ubah FR Kharkongor u la phah ïa ka shithi shah ujor u bah Dasakhiat sha ka DC East Khasi Hills ban leh ïa kaba donkam namar ka Model Code of Conduct kam pat treikam. U bah Bindo ula ong ba ka tnad election ka dei ban leh ei ei halor kane ka dei ban pan jingpynshai na utei u myntri kat kum ki kyndon ba la don lypa. U bah Bindo uba la pynkhreh ban ïakhun na ka Nongkrem Constituency u la ong ba ka tnad Election kam pat ai jubab ei ei ruh sha ki birew kiba ujor ïa u bah Dasakhiat Lamare.
“ Ki la ïathuh ïa nga ba kin ai ka jingujor sha u Chief Election Commissioner, Delhi lada ym ïoh jubab na ka tnad elecction ka jylla” ong u bah Bindo.
Haba la kylli ubah Bindo u la ong “ Haba phi ai pisa ngi ong ïa ki briew shim beit. Ngam don jingpyrshah ïaki briew namar kiba duk lei lei haba ki ïoh pisa ki ïoh jingmyntoi kumta balei yn kynnoh ïaki paidbah namar ki khlem leit dawa. Kaba dei ban pynshitom dei ïa u nongai. Kumta na kata ka daw nga khlem kren pyshah ïaki paidbah namar ki shim ïaka pisa ba ki duk bad donkam. Lada don kiba ai balei ban ym shim. Hynrei uba dei ban ngat ha ki bor ka ai u dei uba pynkheiñ aiñ kein” pynkut u bah Bindo.
