Shuwa ban rakhe Independence Day, pynlong ka Patharkhmah Civil Sub-Division da ka jingïamareh thong
Nongpoh, Nailar 11: Ban rakhe don burom ïa ka sngi laitluid ka ri India kumba la ju rakhe man la u snem ha ka 15 tarik u Nailar ha kylleng ki jaka ka ri India, ka ophis u Sub Divisional Officer ka Patharkhmah Civil Sub Division mynta ka sngi ka la pynlong da ka jingïakop mareh ha ka jingjngai kaba 7 km kum shi bynta ka jingrakhe ïa kane ka sngi Laitluid ka Ri India.
Ïa kane ka jingïamareh thong (Independence run) la sdang na Jirang bad pynkut ha Government Higher Secondary School Patharkhmah, ha kaba u MLA ka Jirang, u Bah Sosthenes Sohtun u la wan ban shim bynta kum u kongsan ban kaweh lama bad la don ryngkat ruh u Bah M.B Tongper, Sub Divisional Officer ka Patharkhmah Civil Sub Division, u Bah Bobby L. NOngbet, District Sport Officer ka Ri Bhoi bad kynthup kiwei kiwei ki riew rangbah,
Kum ka jingai mynsiem ïa ki samla kynthei bad shynrang, ha kane ka jingïakop mareh la ai mynsiem ruh da ka jingshim bynta lang u Bah M.B Tongper kum u Sub Divisional Officer katei ka Civil Sub Division bad da ki phew ngut ki samla na ka thaiñ Patharkhmah-Jirang.
. Haba phai pat sha Kane ka jingïakop mareh jong ki shynrang, u samla Kobarlin Doloi u lawan nyngkong, u Samla Vincent Diya u la wan baar bad u Samla Rigenson Diengdoh la wan ha ka kyrdan kaba lai. Haka jingïakop jong ki kynthei pat ka samla Rikynti Ranee ka la wan Nyngkong, ka samla Banisha Ranee ka lawan baar bad ka samla Moniga Mego ka la wan haka kyrdan kaba lai.
Na ka liang ki bor pynïaid kum ka jingai mynsiem ïa kine ki samla ba la shim bynta ha kane ka jingïakop mareh thong ki la sam ruh da ka khusnam bad ka song pisa sha kitei ki nongjop kaba long shi bynta ka jingrakhe ïa ka sngi laitluid ka ri India.
Na ka liang u MLA ka Jirang, u Bah Sosthenes Sohtun ha kane ka sngi u la ai jingkren ruh ban ai mynsiem ïa kine ki khun samla bad kumjuh ruh ban kynmaw burom ïa ki khlawait ka ri kiba la len lade ïa la ka jingim na ka bynta ka jinglaitluid ka ri India bad kum u MLA u la kyntu ruh ïa ki samla ba ka dei pat ka kamram jongki mynta ban leh ei ei na ka bynta ka ri bad ka jaid bynriew khnang ba kum ka jylla bad ka r ikan dang kiew shaphrang ha baroh ki liang.