Shut bha ïa ki reng shwa ban mih madan ha u 2023, ong u CM ïa ki kyrtong NPP

0

Shillong, Risaw 27 : U National President ka NPP uba long ruh u Myntri Rangbah ka jylla u Conrad K Sangma mynta ka sngi ula kyntu ïa ki kyrtong jongka NPP ba ki dei ban shut bha ïaki reng shwa ban ïamih madan ha u 2023 namar ym dei ban shu khei sting.
“ Ngi donkam ban long kiba la pynkhreh bad shim khia bha ïa ka kam bad nga kwah ba baroh ki kyrtong jongka party kin leit sha ka election da ka jingpynkhreh ym ban shu mih madan khlem da don ka jingmut jingpyrkhat kaba shim khia ban shakri ïa ki paidbah” ong u Conrad.
U la ong “ Ym dei ban kheiñ sting bad kheiñ troiñ ïa u ne ka nongïaleh pyrshah namar ka election te ka election bad u kyrtong te u kyrtong wei ba u la mih madan ban ïa aireng”
U la ong da kata ka jingmut ka party ka la pynkhreh bha ïa ka election 2023. “ Ngi ïaleh katba lah ban jied ïa ki kyrtong kiba biang bad ngi trei shitom bha ban pynkhaiñ ïa ka party bad to ngin ïa kyrmen ïa kaba bha namar ka election barobor ka long kaba ym lah ban kheiñ sting satia”.
Wat la u myntri rangbah um pat treh ban ïathuh la ka NPP kan pynïakhun na baroh 60 constituency hynrei ula ong “Ngin pyrshang ban ïakhun beit na baroh”. Haba la kylli kiei ki kyndon kiba ka party ka buh na ka bynta ki kyrtong, u la jubab “ Ngi hi kum ka party kaba kongsan eh ngi bishar ka dei ka jingbud beit bud ryntih bad kohnguh ïaki kyndon ne ïaka riti pyniaid party, ka jingthrang ban shakri ïaki paidbah bad ngi phai ruh sha u kyrtong uba don jingkyrmen ban jop. Kine ki long ki kyndon kiba hakhmat eh ngi buh. Nalor kata ngi bishar ruh wat ïa ka jinglong jingman,ka akor ka burom jongu kyrtong bad la u thrang shisha ban shakri ïaka constituency”.

Leave A Reply

Your email address will not be published.