Shillong, Risaw, 28: Ka ding kaba la klang i shyrkhei haduh katta katta ka la bamduh ïa ki 84 tylli ki dukan ba shipor ha ïew Shyllong, Laitumkhrah ha ka step phyrngab jong ka sngi Thohdieng ha ka por 4:00 baje eiei antad.
Ka jingpluh jong kine ki dukan ha kane ka ïew ka la wanrah ïa ka jingduhnong kaba khraw bha ïa ki nongshong ïew kiba ju im kamai jakpoh manla ka sngi namarba ki mar ki mata, ki jhur ki jhep ki la julor lut na ka jingpluh jong ka ding.
Ki Pulit ka Fire & Emergency Services kiba don ha Laitumkhrah ki la wan poi marmar tang shu ïoh jingtip halor kane ka jingjia ban pynlip ïa ka ding kaba la klang bha.
Ha kaba ïadei bad kane ka jingjia, ki Pulit ka Laitumkhrah Police Station ki la leit ban pynlong ïa ka jingtohkit bad na ka liang jong ki ophisar jong ka ophis ka Deputy Commissioner ka East Khasi Hills ruh ki la leit ban lum jingkheiñ halor ka jingduh jingsep jong ki mar ki mata ha kane ka ïew.
Katkum ka jingïathuh jong u Rangbah Shnong ka Laitumkhrah u Bah Andrew Jyrwa, la ong ba ki nongshong ïew ki ladep pyntip sha ki bor ba dei peit jong ka Shillong Municipal Board (SMB) ba ka don ka jingthud jong ka bording ha kane ka ïew bad ha kajuh ka por ladep pyntip ruh sha ka MeECL.
U la ong ba ki nongtrei ka MeECL ki la shu wan peit tang ïa ka jingthud jong ka bording hynrei ki buh teng ban pyndep ïa la ka jong ka kamram khlem ka jingpoi pyrkhat ba kan wanrah pynban da kane ka jingjia kaba sngewsih ïa ki nongshong ïew.
U la ïathuh ruh ba ka jingbym ïohlad ban sei ïa ki mar ki mata jong ki nongshong dukan ka dei namarba u nongbat shabi uba ju plie ïa ka khyrdop ban rung sha kane ka ïew u la poi kham slem ynda la pyntip shaphang kane ka jingjia.
“Ka long kaei kaei kaba sngewsynei ïa ki nongshong ïew namarba dang shen ki la her syrngiew na ka jingpynbthei bom IED hynrei mynta pat ki la ngat sa ha kane ka apot,” la bynrap u Bah Andrew.
Ka MLA jong ka East Shillong Constituency ka Dr. M. Ampareen Lyngdoh mar mar ka la leit jurip ïa kane ka jingjia bad ïakren bad ki nongshong dukan kiba la mad ïa kane ka apot na ka jingjulor jong ki mar ki mata.
Ha ka jingïakren bad ki lad pathai khubor ka Dr. Ampareen ka la ong ba kan sa wadlad kumno ban ïarap ïa ki nongshong dukan bad ïathuh ruh ba kan sa lum jingïalang ïa ki Rangbah Shnong bad ki Rangbah Dong kynthup ruh ïa ki trai dukan ban pyrkhat ïa ki lad ki lynti ban ai jingïarap ïa ki nongshong dukan khnang ba kin ym ïap thngan ne la kan bhah na ka skhim MLA ban siew ïa ka bai duh bylla jong ki.
“Ïa ka rai kaba mih na ka jingïalang, ngin sa leit rah ban pynsngew hakhmat u Myntri Rangbah ka Jylla,” la bynrap ka Dr. Lyngdoh.
Ka la ïathuh ruh ka ladep ïakren bad u Myntri Rangbah ka Jylla u Conrad K. Sangma halor kane ka jingjia bad u la ai ka jingkular ban phah shna pynsted ïa kane ka ïew khnang ba ki nongshong dukan kin ïoh noh ïa ka ïew kaba thymmai.
Kum ban shu pyntip hangne, ïa u mawnongrim ban tei ïa ka ïew ba thymmai jong ka Ïew Shyllong la buh da u Myntri ka tnat Pynroi Sor ka Sorkar Jylla u Bah Sniawbhalang Dhar ha ka 9 tarik, Rymphang, 2022 lyngba ka jingbei pisa na ka Shillong Smart City Limited (SSCL) ha ka jinglut kaba T.28, 84,72, 139 klur ba la pyntrei da ka Shillong Municipal Board (SMB) bad la buh thong ban shna pyndep hapoh 24 bnai.
