Pynrem ka MEPA , SPC, TUR, KAM ba shah ktah kti ki nongthoh khubor Mawphor bad Batesi TV

Shillong, Risaw, 28: Ka Meghalaya Editors’ and Publishers’ Association (MEPA) ka la pynrem jur halor ka jingleh tohmet jong ka kynhun ki samla ïa ki arngut ki nonglum khubor ba kynthup ïa ka Kong Ribha Mary Suchiang ka Cameraperson jong ka Batesi TV bad u Bah Evangelist Khongwar u Reporter jong u Mawphor katba ki dang pyndep ïa la ka jong ka kamram ha ka jingïaid paidbah ba la pynlong da ka FKJGP ha nongbah Shillong ha ka sngi Thohdieng ban pynsngew sha ki tyndong shkor jong ka Sorkar Jylla halor ka jingkyrduh kam jong ki samla.
“Ka jingshisha hi ka paw ba ka kynhun ki samla kim shym la map satia wat ïa ki arngut ki nonglum khubor wat hadien ba ki la pynithuh ïalade kum ki Nonglum Khubor ka long kaei kaei ka jingjia ka bym lah satia ban pdiang,” ong u kyrwoh ba la phah da u President ka MEPA u Bah R. Monarch Shabong bad u General Secretary u Bah John. W. Thabah.
Namarkata, ka MEPA ka kyntu ïa ki nongpynlong ïa ka jingïaid paidbah ba kin sei mardor ïa ki briew kiba donkti ha kane ka jingjia bad ban aiti sha ki bor jong ka aiñ bad ha kajuh ka por ban panmap ïa kitei ki arngut ki nonglum khubor halor ka jingshah ktah kti bad shah leh tohmet ka jong ki.
Ka Shillong Pres Club (SPC) ka pynrem jur halor ka jingshim kabu jong ki runar kiba kup dur bula kum ki nongïashim bynta ha ka jingïaid rally na Motphran sha Madan Iewrynghep ban thaw jingkulmar bad ban shoh ban dat ïa ki nongïaid lynti bad ïa ki nonglum khubor.
Ka SPC ka pynrem jur halor kane ka jingjia, ong u kyrwoh ba la phah da u President ka Shillong Press Club u Bah David O. Laitphlang.
Haba ïaroh ïa ka jingkloi panmap jong u President ka Federation of Khasi Jaiñtia and Garo People (FKJGP) ha ka jingïalang hadien ba la kut jingïaid paidbah bad kyntu ïa ki dkhot ka seng ban kiar na kino kino ki kam kiba shah kynthoh ha ka imlang ka sahlang, ka Shillong Press Club ka maham jur ïa kito kiba donkti ban thaw jingkulmar kiba pyrshang ban pynsniewdur ïa ka jingïaid rally kin ym lait satia na ki kti jong ka aiñ.
“Ki nonglum khubor ki pyndep ïa la ka jong ka kamram katkum ba la bynshet ïa ki na ka bynta ka jingmyntoi ki paidbah bad kane ka jingjia ka long ka bym lah satia ban pdiang. Ka Shillong Press Club ka kyntu ïa ki bor synshar distrik bad ïa ka tnat Pulit ban shimkhia halor kane ka jingjia katkum ki kyndon jong ka aiñ,” ong u kyrwoh.
Ka TUR bad ka KAM Meghalaya ha u kyrwoh ki la pynrem jur ïa ki kam shoh briew bad pynkulmar kaba la jia ha ka sngi Thohdieng ha ki surok jong ka thaiñ Laitumkhrah ter ter da ki riew shong shit kiba ïashim bynta ha ka jingïaid rally na ka bynta ka ïohkam ïohjam kaba la pynlong ha Madan Iewrynghep, Laitumkhrah Shillong .
“Ka jingpynkulmar bad jingshoh briew da ki nongïaid rally ka long kaba ym lah ban pdiang satia bad kaba la buh ïa ki nongïaid lynti khantam ki Kynthei khynnah ha ka jingma bad jingsyier kaba khraw,” ong ka Convenor jong ka Tur ka Kong Angela Rngad ha u kyrwoh.
“Kaba lyngngoh shuh shuh ka long ba ym don ki bor pahara pulit kiba synran ïa ki nongïaid rally bad kane ka jingkheiñ sting jong ki bor district bad tnat pulit ka long ka jingleh bymsuidñiew bad jingbym kheiñ snep ïa ki nongshong shnong. Ngi pynrem jur ïa ka jingkheiñ sting jong ki bor ka Aiñ bad dei ban pynshitom jur ïa ki ophisar pulit bad majistior kiba dei ban peit ïa kane ka jingïaid rally,” ka la ong.
“Ka jingjia mynta ka sngi i kumba ka, Sorkar ka ïa don bynta lang bad thmu khnang ban pynmih ïa ki jingkulmar. Kane ka lah ban dei ka buit elekshon jong ki seng saiñhima kiba don ha ka Sorkar bad bym dei sorkar ban pyntieng pynsmiej ïa ki briew. Kane ka Sorkar ba ka lamkhmat da ka NPP, UDP, PDF, HSPDP, BJP bad ki Independent ka lah pheil ha baroh ki liang bad kane ka jingkulmar ka lah ban long ba ki thaw khnang ban pynklet ïa ka jingbymler kam bad jingbam sap jong ki,” la kynthoh ka TUR bad ka KAM Meghalaya.
“Sa shisien ka TUR bad ka KAM Meghalaya, ki pynrem jur ïa ka Sorkar MDA bad ka kyntu ruh ïa ka Iingshari ban buh jingkylli ïa ka Sorkar halor ka jingbym lah ban tehlakam ïa kine ki kam pynmynsaw bad pynkhreh lypa na ka bynta kane ka rally,” la ong shuh shuh u kyrwoh.