Bthah u DyCM ïa ki pulit ban thwet ïa ki nongpynkulmar

0

Shillong, Risaw 28 : U Symbud Myntri Rangbah ka jylla, Conrad K Sangma ha ka sngi Thohdïeng u la ong ba ka sorkar jylla ka la bthah ïa ki pulit ba kin thwet bad pynshitom ïa kito ki briew kiba donkti ban ktah kti bad thombor ïa ki paidbah kiba ïaid lynti ha ka sngi ba don ka jingiaid paidbah kaba la long ha kane ka sngi Thohdïeng.
Ha kane ka jingjia ki nongthoh khubor ruh ki la shah ktah kti lang ha kitei ki briew kiba shim bynta ha katei ka jingïaid paidbah ba la pynlong da ka Federation of Khasi Jaiñtia and Garo People (FKJGP).
“Ngi la aibor ha ki pulit ba kin leh ïa kaba donkam bad nga la dep ruh ban kren ïa u SP (City) bad mynta ki pulit ki don ha ka kam ban wad ïa ki,” ong u Symbud Myntri Rangbah ka jylla haba kren bad ki lad pathai khubor.
Halor ka jingkylli, u Bah Prestone u kyntu ruh ïa ki nongïalam jong ka FKJGP bad kumjuh ruh ïa kiwei ki sengbhalang ba kidei ban tehlakam ïa ki dkhot lajong khnang ba kan mih kano kano ka jingkulmar ne kino kino ki jingeh haba don kum kitei ki jingïaid paidbah.
“Ka khubor kaba shai ka long, phi lah ban ïaid paidbah ba kaba jai jai lada phi kwah, tangba sngewbha wat pynmih ki huri hura lane ki jingshong syier. Nga kyntu ïa ki nongïalam ka FKJGP bad ïa kiwei ki nongïalam sengbhalang ba phi lah ban pynlong ïa ki jingïalang hynrei ha kajuh ka por tehlakam ïa ki dkhot lajong namar ngim kwah ban mih ki jingkulmar ha ka jylla,” u la bynrap biang.

Leave A Reply

Your email address will not be published.