Shillong, Nohprah 12 : Ka lympung ïalehkai softball ba la tip kum ka 3rd Meghalaya Open Softball Championship 2023 kaba la sdang ha ka sngi Nyngkong ha madan Polo bad kaban pynhap pyrda noh ha kane ka sngi Balang da u Myntri ka tnad ki Kam Ïalehkai, ka la shongshit bha khamtam haba bun na ki nongïalehkai kim dei kiba la tbit lut ha katei ka jait jingïalehkai.
Ha kane ka lympung, ki la don haduh 12 tylli ki kynhun kiba wan shim bynta, kine ki kynthup ïa ki hynriew kynhun na ka liang ki shynrang bad hynriew kynhun na ka liang ki kynthei.
Na ka liang ki shynrang kiba wan ban shim bynta ki kynthup ïa ka Nongpoh, Jowai, Dkhiah, Mawsynram bad ka Nongstoiñ. Katba na ka liang ki kynthei pat ki kynthup ïa ka Lynti Jam (Ri Bhoi), Jowai, Dkhiah, Mawsynram, Mairang bad Mawkyrwat.
Baroh ki la don haduh 156 ngut ki nongïalehkai kynhup ïa ki 10 ngut ki nongpeit ïa ki kynhun.
Haba phai pat shaka jingïakhun jong ki kynthei, ka Mawsynram ka la shah rem noh ha ka Dkhiah da 7-9 kol, ka Mawkyrwat pat ka la pynliem ïa ka Mairang da 12- 0 kol, ka Jowai pat ka la pynliem ïa ka Dkhiah da 10-8 kol.
Katba ha ka liang ki shynrang pat, ka Nongstoin ka la pynliem ïa ka Nongpoh da 10-6 kol, ka Mawsynram ka la pynliem ïa ka Jowai da 17-9 kol bad ka Dkhiah ka la pynliem ïa ka Nongpoh da 13-1 kol.
Ka jingïakhun ha kane ka sngi ba khatduh kan sdang da ka jingïaknieh ïa ka kyrdan kaba lai hapdeng ka Mawkyrwat bad ka Dkhiat ha ka liang ki kynthei bad ka Nongstoin bad ka Jowai pat ha ka liang ki shynrang.
Haba phai pat sha ka jingïakhun ïa ka final, ka kynhun jong ka Lynti Jam na Ri Bhoi District kan hap ban aireng pyrshah ïa ka Jowai ha ka liang ki kynthei. Katba ha ka liang ki shynrang ka Dkhiah kan hap ban ïakhun pyrshah ïa ka Mawsynram.
