Shong jingïalang ka bor District Ri Bhoi bad Kamrup (Metro) ban weng ïa ka jingshlei um ha Jorabat-Khanapara

Nongpoh, Nailar 17: Ki bor district jong ka Ri-Bhoi lem bad na Kamrup (Metro) jong ka jylla Assam mynta ka sngi kila shong jingïalang ha DRDA Nongpoh naka bynta ban ïamir jingmut bad ban ïatai sani kumno ban weng ïaka jingeh ha kaba ïadei bad ka jingshlei um naka por shaka por haka thaiñ Jorabat shaduh Khanapara.
Kumban shu kdew hangne ka thaiñ Joarabat haduh ki thaiñ Khanapara ki dei ki jaka kiba jur ka jingshlei um tang shu jur slap Kaaba wanrah jingeh shikatdei ïaki paidbah ba shong ba sah ha shilynter u surok National Highway bad kumjuh ruh ki kali kiba leit ba wan namar ka surok bah tang shu jur slap kala kylla long kum ka wah bah.
Ïa katei ka jingïalang bala long ha DRDA Hall ha Nongpoh la khlieh da ka kong Balakyntiew Ranee Additional Deputy Commissioner ka Ri-Bhoi haka jingdonlang ki heh ophisar ka district katba naka bor district jong ka Kamrup (Metro), Assam la lamkhmat da u Raja Baishya kum u ADC.
Lyngba kane ka jingïalang ka thong ba hakhmat hi ka long ban lap ïaka daw tynrai jong ka jingshlei um ha katei ka thaiñ bad kumno ban weng ïa katei ka jingeh khamtam ban don ka jingïatreilang hapdeng ka sorkar Meghalaya bad Assam.