Shillong, Nailar 20: Ka jingjur jong u slap ha kine ki 12 kynta ba la leit ha ka jylla bad khamtam eh ha nongbah Shillong la ïohi ba kiba bun ki jaka khamtam ka thaiñ Polo ka la dap da ka jingshlei um bad ki don katto katne ki jaka sha ki thaiñ Nongmensong bad kiwei ki jaka ki la dap da ka um.
Ha ka jingleit jngoh u nongthoh khubor ha ka sngi baar ïa ka thaiñ Polo la shem ba kane ka jaka khamtam ka jaka ba don hajan ka ïew Polo la shem ba ka surok ka la dap da ka um bad ki nala ruh ki la shlei da ka um na ka daw jong ka jingïaibteng jong ka jingjur u slap ha kine ki 12 kynta tam ba la leit noh.
Lah ban ong ba ka thaiñ Polo kadei kawei na ki jaka kaba ju mad manla u snem ne man ha ki por ba ju jur bha u slap bad kane ka la wanrah shibun ka jingeh ïa ki paidbah khamtam eh ha ka por mynstep kaba dei ka por ba bun kam bha ha kaba ki briew ki ïa bun kam ban leit buh ïa la ki jong ki khun sha ki skul bapher bapher ka nongbah.
Kane ka thaiñ Polo lah ban ong ba kadei ka surok kaba bun kam bha naba ka dei kaba bun ki lad ha kaba bun ki paidbah ki ju pyndonkam ïa kane ka surok naba ka lam sha ki thaiñ Laitlumkhrah bad kiwei ki jaka kiba bun ki skul kaba ki briew ki ju phah ïa ki khun ban leit skul sha kitei ki thaiñ manla ka sngi.
Kane ka jingshlei bad jingdap um ka thaiñ Polo kaba la ju long manla ka por ka la buh ka jingkylli kaba bun ïa ka rukom shna ïa ki nala bad kumjuh ruh ïa ka surok naba ka thaiñ Polo manla ka por, haba don ka jingshlei um ka ju ktah bha ïa ki nongshong shnong kiba sah ha kane ka thain naba bun ki thliew ïing ki ju dap barabor da ka um tang shu la dei ka por ban hab slap ne ka por liur, kumta ka la dei ka por ïa ki bor ba dei peit khmih ba kin shim khia halor kane ka jingeh.
