Shillong, Rymphang 14: Ka resol jong ka elekshon shiteng samoi ban jied ïa ki nongkitkam bad ki Councillor sha ka Apex Council jong ka Meghalaya Cricket Association la pynbna ha ka 13 tarik u Rymphang, 2025. kane ka la wan hadien ba la khmih bad bishar bñiah ïa ki kot ki sla (aplikeshon) jong baroh lai ngut ki kyrtong kiba la thep kyrteng na ka bynta ki lai tylli ki kam kiba lait bad la pynbna ba ki long kiba biang.
ïa kane ka resol la pynbna paidbah da u Bah W Khyllep, IAS (Retd), Chief Electoral Officer barim, ka Sorkar Meghalaya bad u Electoral Officer jong ka Meghalaya Cricket Association, ha kaba baroh lai ngut ki kyrtong, kiba la thep kyrteng hapoh ka tarik ba la buh, la pynbna ba kila shah jied khlem don nongïakhun pyrshah na ka bynta ka samoi treikam ba dang sah jong u snem 2022-2025. U Bah W Khyllep u la aiti ruh ïa ki syrnot jong ka elekshon sha ki kyrtong kiba jop.
U Bah Rayonald Kharkamni uba dei u Vice-President ka MCA uba la mih noh na ka kam u la shah jied kum u Honorary Secretary, kaba la bat baroh shi katta da u Bah Gideon L. Kharkongor, katba u Sengnab Momin, u la shah jied kum u Vice-President.
Kane ka elekshon shiteng samoi ka la long kaba donkam hadien ba u Bah Gideon Kharkongor – uba bat ïa ka kam Honorary Secretary shuwa kane ka elekshon shiteng samoi, u la pynpaw ha ka AGM ba la dep jong ka MCA ïa ka jingkwah jong u ban shah pyllait noh na ka kam kaba u bat namar ka jingkiew ka jingkit jingbah jong ka kam. Hynrei un dang bteng ban nohsynñiang sha ka MCA namar ba u la shah jied ban long dkhot (Councillor).
Kham mynshwa, ka general body jong ka MCA ka la ai bor ïa ka Apex Council ban rai halor katei ka mat bad hadien ba la ai jingmut ïa ki kyrtong, la pynskhem ïa ki rai ba la shim ha ka SGM ba la long ha ka 01 tarik Rymphang, bad ïa ka elekshon shiteng la pyntip da u Electoral Officer na ka bynta ki lai tylli ki kam ba thylli, kumba la pynbeit ha ka kyndon ba ïadei jong ka Memorandum jong ka Association & ki kyndon jong ka MCA.
