Khliehriat, Nailar, 02: Ki Pulit jong ka Ladrymbai Out Post, ha ka sngi Balang ha ka por kumba 5.30 baje mynstep ki la leit shimti ïa kawei ka met ïap jong uwei u rangba na surok Ladrymbai Bypass ba la suba jur ba une u rangbah u la shah pynïap dusmon ha ki riew thrang snam bym lah satia ban tip.
Ïa une u rangbah uba la thiah lyngktar ha surok, la lap ba ki don ki dak mong bad nalor kata la teh ruh ïa ki kti jong u da u tyllai.
Kumba paw, ka la don ka jingmong bad jingmih snam na ki bynta ka khmut ka khmat bad ki don ruh ki dak pruid ba mong bad ba jngem snam ha ki bynta ka shadem bad ki kti jong une u rangbah.
Ki Pulit ki suba jur ba imat ïa une u rangbah ladep pynïap shwa sha kawei ka jaka hynrei la shu wan bret sha kane ka surok Ladrymbai Bypass.
Halor kane ki Pulit ki la ujor da ka ejahar ha Ladrymbai Outpost.
Hadien ba ladep ban leh ïa ki jingdonkam katkum ka aiñ, ki Pulit ki la pynkit noh ïa ka met sha ka jaka buh metïap ha Khliehriat Civil Hospital ban leh ïa kaba donkam.
Kat haduh ba la thoh ïa kane ka khubor, ym pat shym la don ba kam trai ïa ka metïap jong une u rangbah.
Na ka liang jong ki Pulit ki la pyntip ba lada don mano mano ba ithuh ne lada don ki bahaiïng hasem kiba ithuh kin leit pyntip sha ki Pulit da kaba telephone ha u Nombar 98620 91578.
Une u rangbah uba suba shah pynïap dusmon, u don ka jingjrong kumba 5 phut, u shñiuh khlieh uba iong, ka snieh doh kaba lieh, u phong da ka patlun Jean rong iong, kaT-shirt rong jyrngam bad ka patlun poh rong jyrngam.
