Ailad ban pynpoi ïa ki masi shohdoh sha Meghalaya, kyntu u Myntri ïa ka Sorkar Assam

Shillong, Nailar 02 : U Myntri ka tnad Animal Husbandary and Veterinary ka sorkar jylla, Bah AL Hek ha ka sngi Balang u lapyntip ba u la dep ban ïa kren bad ka sorkar Assam ba kan pyllait ïa ka jingpynpoi ïa ki masi shohdoh ban wan sha Meghalaya.
“Ngi la dep ban ïa kren ïa kane ka kam bad ka sorkar Assam bad ha ka jingshisha nga la dep ruh ban ïa kren bad u Myntri ka tnad Animal Husbandary ka sorkar Assam ha Guwahati bad nga la kren ruh bad ba kitei ki mrad ki ïaid lyngba ka National Highway,” ong u Bah Hek haba kren bad ki lad pathai khubor.
Da kaba kubur ba ka Assam ka la khang ban kit masi, hynrei u Bah AL Hek u la ong ba na ka liang ka jyla ka pyndonkam da ka National Highway ban kit ïa ki bad ym dei satia da ka state road. “Ka National Highway kadei jong baroh wat ha Meghalaya ruh ka National Highway kam dei satia ka state road. Phim lah ban ong ba phin ym lah ban kit ei ei ha National Highway hynrei tang lada khang ïa ki National Highway kata ka lah ban long da kumwei pat,” u la bynrap biang.