Shimkhia ki ar Myntri Rangbahduh Meghalaya-Assam ban pynbeit ïa ki jingïakynad ha Lapangap : Dy.CM

Shillong, Jymmang 18 :Ki ar Myntri Rangbah jong ka Meghalaya bad Assam ki la shimkhia bha ban ïakren kumno ban pynbeit noh ïa ka jingïakynad kaba mih ha Lapangap, ong u Symbud Myntri Rangbah Ma Sniawbhalang Dhar ha ka Lah Sngi U Blei, hadien ka jingïalang bad ki shnong ka bym shym la poi sha ka jingshim rai.
“Baroh arngut ki Myntri Rangbah ki la ïakren halor kane ka kam bad ki la shimkhia bha” ong u Ma Sniawbha haba ïakren bad ki nongthoh khubor, haba ban jur ba kane ka kam ka dei kaba la ïaid ha ka jingïakren pynbeit ha ka kyrdan ba halor eh.
Kane ka jingkren ka la mih hadien ba ki nongmihkhmat na baroh artylli ki Shnong ki la ïakynduh ha ka jingïadonlang ki Deputy Commissioner bad Superintendent of Police na Meghalaya bad Assam.
“Kala don ka jingïalang hapdeng ki Shnong ha ka jingdonlang ki bor district na baroh arliang” ong u Ma Dhar. “Ka jingïalang ka biang bha bad ka la ïaid suk hynrei ula pynthikna ba kam shym la don kano kano ka jingshim rai”.
“Ki dang don katto katne ki kam kiba dang sah” ula ong. “Khatduh, ka rai ba kumno ban ïaid shakhmat, ngim pat lah ban rai bad ngin sa ïapeit ha kine ki arsngi lane lai sngi ban wan”.Ka kam rep kam riang ha kane ka jaka ba ïakajia ka dang sahkut bad ym pat lah ban pynïaid shakhmat.
Haba kylli la ka rep ka riang kala sdang biang, u Ma Sniawbha ula ong “Kat haduh mynta ka sngi, kam pat sdang satia”.U Dy CM ula pynshai ba ka jingïakajia ha Lapangap kam dei satia shibynta jong ka jingïakren pynbeit khappud.“Halor ka kam Lapangap, kam dei ka jingïakajia pud, ka dei eh halor ka jakpoh” ula ong.
Halor ka wat kaba ar jong ka jingïakren pynbeit pud, u Ma Sniawbha ula ong ba ka Meghalaya ka dang ap ïa ka Assam ba kan thung biang ia ka Regional Committee ba thymmai jongka.