Shimkhia ka ïingbishar HC ba shah thombor 2 tylli ki kali bad nongtrei ha ka 19 tarik

Shillong, Nailar 24 : Ka ïing Bishar High Court ka la shim khia ïa ka jingshah thombor ki artylli ki kali ka ïing Bishar bad ka jingshah shoh u PSO bad u Nongniah ha ki kam thombor ba jia ha ka rally thuk thuk ka KSU ha ka 19 tarik Nailar.
Haba shong bishar ïa ka PIL ha ka sngi Nyngkong, ka division bench u Justice HS Thangkhiew bad Justice W Diengdoh, ka la bishar bniah ïa ka kaiphod ba la aiti da ka Jylla kat kum ka hukum ba pynmih ha ka 20 tarik Nailar.
U Advocate General A Kumar ula pyntip ïa ka ïing Bishar halor ki sienjam ba la shim, kynthup ka jingthung ïa ka kynhun Special Investigation Team (SIT) ban pynsted ïïa ka jingtohkit halor ki jingjia ba jia ha ka 19 tarik Nailar, bad ban aiti ïa ki jingtip ba bniah jong ki case ba la register halor ki kam pynjulor nongkynti bad shoh briew.
Ka ïing Bishar ka la pynpaw ba ka jingtohkit la ïohi ba ka la ïaid shakhmat hynrei lait na ka jingkem ïa ki nongïalam, ym shym la don shuh ka jingkem ïano ïano ruh.
“Ka ïing Bishar ka pynpaw ruh ba ha kine ki jingjia, 2 tylli ki kali jong ka High Court ka jylla, ha ka jingdon lang ki Ophisar, kiba shah thombor bad ki briew, kynthup ïa u PSO bad u nongñiah kila shah shoh. Haba ïadei bad kine ki case kaba paw ha ka SL No 7 & 8, ki liang mamla ka Jylla ki dei ban aiti ïa ka case diary” ong ka hukum.
Ka ïing Bishar kala bthah ruh ba dei ban pyrkhat ha ka ban pynsted kumjuh ïa baroh ki case, kynthup ka jingthombor ïa ka bos kamai paidbah.
Haba buh bishar biang ïa ka kam ha ka 1 tarik Nailur, ka ïing Bishar ka la bthah ïa ka Jylla ban aiti ïa ka kaiphod thymmai kat kum ka jingïïaid ka kam bad ban aiti ïa ki case diary, haba shim ba ka jingtohkit ka dei kaba dang shu sdang.