Shillong, Nailar 24 : U Myntri Rangbah ka Jylla Conrad K Sangma ha ka sngi Nyngkong, ula ai ka jingkyrshan ïa u Advocate General u Amit Kumar halor ka jingdawa weng jong ka High Court of Meghalaya Bar Association.
U Conrad ula pyntip ba um pat shishar ïa ka jingdawa jong ka Bar Association hynrei ula ban jur ba ka Sorkar ka donkam palat ban ïoh ïa u Kumar kum u AG.
“Ngam pat pule bniah ïa ka jingdawa bad ki jingpyni nia. Kaei kaba nga kwah ban ong ka long ba ka Meghalaya ka donkam palat ban don ïa u briew kum u Amit Kumar ban long kum u Advocate General jong ngi” ong u Myntri Rangbah.
U ïathuh ba ki Ophisar ba la shongthait bad kiba dang shakri lem bad ki Myntri Sorkar kin kyrshan ïa ka synñiang jong u Kumar, haba bynrap ba da kaba burom ïa ki AG kiba rim bad kito kiba don ha kiwei ki Jylla, ka Sorkar ba mynta ka kmen bha ïa ka jingtreikam jong u.
“Ula trei naduh ka mynsiem na ka bynta ki paidbah bad ka Jylla bad btin lynti ïa ka Sorkar ha kiba bun ki kam kiba kongsan. Ki kam ki jam ki lah ban ïakynduh ïa shibun ki jingeh lada um don ma u. Ula ïarap ïa bun ki tnad ban weng ïa ki jingeh ha ka liang ka aiñ” ong u Conrad.
Haba kyntait ban kynthoh ïa ka nongrim jong ka jingdawa ban weng ïa u, u CM ula ong ba u Kumar ula jied ban shakri ïa ka Meghalaya ban ïa ka jinglong nongïasaid aiñ ha Supreme Court kaba heh kamai.
