Shim bynta ki samla pule Ri Bhoi College ban ïa tai halor ka jingktah u drok ryngkat ki lad ai jinghikai da ki riew shemphang

Nongpoh, Nailar 07: Kum shi bynta ban ai jinghikai sha ki samla pule halor ka jingktah u drok bad kumjuh ruh halor ka jingkhaïi beaiñ ïa u drok uba la ktah ïa ka imlang ka sahlang, ka Ri Bhoi College lyngba ka Health and Hygienic Cell ha ka 4 tarik u Nailar 2023 ka la pynlong da ka prokram ai jinghikai ba kyrpang shaphang ka jingktah u drok bad ruh halor ki kam khaïi beaiñ ïa u drok ba kum ki samla ki hap ban kiar na une u jingdih basniew uba la ktah shibun eh ïa ki samla bad ïa ka imlang ka sahlang.
Ïa kane ka prokram ai jinghikai shaphang ka jingktah u drok la pynlong ha Ri Bhoi College ryngkat ka jingïatrei lang bad ka De-addiction Centre ka Downtown Hospital, Guwahati ha kaba la kyrshan da ka HDFC Bank, Nongpoh.
Ha kane ka sngi, nalor ki samla pule katei ka Ri Bhoi College kiba la wan ban shim bynta ha kane ka prokram ai jinghikai kiwei kiba la ïa don lang ki kynthup ïa u Dr. Prabir Thakuria, MBBS, Department bad u Psychological Counselling, ka Down Town Hospital Ltd, u Branch Manager ka HDFC Bank, Nongpoh, u Jayanta Mudoi, ka Kong Ibadahun Kharkongngor, Assistant Branch Manager, u Sandip Paul bad kynthup kiwei kiwei ki nongmihkhmat na ka Ri Bhoi College.
Kumba la pynpaw ha katei ka sngi, ka jingthmu ba la pynlong ïa kane ka prokram na ka bynta ki samla pule, ka long ban ai jinghikai sha ki samla halor ka jingshah ktah na ka jingkyrni ha u drok bad ha kiwei ki jingdih basniew kaba ktah ïa ka koit ka khiah bad ruh kaba wan rah ïa ka jingpynjot ïa kiba bun ki samla ba lui lui haba ki la kyrni ha kine ki jingdih ba sniew.
Nalor ka jingai jinghikai lyngba u Dr. Dr. Prabir Thakuria shhaphang ka jingktah jong u drok bad ha kane ka sngi la ai jinghikai ruh halor ki lad ki lynti kumno ban ioh jingkoit ne shah sumar khnang ba kito kiba la ngop kin lait na une u jingdih basniew uba la pynjot ïa bun ki khun samla ba lui lui tang namar ba ki la shah ïalam bakla ne la kum ngop ban dih ïa kine ki jingdih basniew.