Ka Project ‘Ka Lawei’ ka thymmei ai jinghikai ba thymmai ha ki skul ha EJHD la sakhi da u myntri ka tnat pule puthi

Khliehriat, Nailar 7: Ki bor district jong ka East Jaiñtia Hills District, mynta ka sngi ka la pynlong ïa ka prokram pynkup burom ïa ki nonghikai jong ki klas 8, 9,10 bad kane ka prokram ka dei halor kawei ka project ‘Ka Lawei’, kaba dei ka project ai jinghikai ïa kibkhynnah hapoh ki skul kaba da ki TV screen. Ïa ka prokram la pynlong ha Auditorium Hall of Don Bosco College, Byndihati, ha kaba u myntri jong ka tnat pule puthi, u Rakkam A. Sangma, u la long kum u kongsan ha kane ka sngi, ka MLA jong ka 5-Sutnga Saipung Assembly Constituency, ka kong Santa Mary Shylla, kum ka symbud kongsan, la ïa don lang ruh u Advisor jong ka sorkar jylla Meghalaya, u bah H.M.Shangpliang, u Deputy Commissioner East Jaiñtia Hills District, u Abhilash Baramwal, IAS bad kiwei kiwei ki heh sorkar.
Kane ka project “Ka Lawei” ka dei ka Digital Learning na ka bynta ki khynnah kiba pule ha ki skul ha East Jaiñtia Hills District ba ka saiñdur da ki bor district jong ka East Jaiñtia Hills District, kaba don ka thong ban pynlong ïa ki khynnah ba kin ïoh ïa ka lad ban pule khamtam ha ki jaka nongkyndong ba kin pule da ki digital ba ju tip ruh kum ka Digital Smart Class Room kaba pule lyngba ki TV Screen bad ïa kine ki Digital TV lane ki Digital Smart Class Room , la lah ban buh ha ki 50 tylli ki skul hapoh ka district.
Haba kren kum u kongsan, u Rakkam A. Sangma, u la kren shaphang ka jingdonkam ka stad ha ka thoh ka pule bad ong ba ka jingnang jinstad ka dei ka atiar kaba khlaiñ ka ban kyntiew ïa ka im lang ka sahlang, ïa ka ri hi baroh kawei khamtam ha kum kane ka juk jong ka jingïakhun.
U la ong ruh ba kane ka project Ka Lawei ka thew ïa kata ka digital learning, ka ba ai mynsiem ïa ki nonghikai ba kin don ka jingïadei kaba jan bha bad ki khynnah skul ha kaba ïadei bad ka pule puthi “ Ka sorkar Meghalaya ba la lam khmat da u myntri rangbah ka don ka jingthrang ban kyntiew ïa ka pule puthi” u la bynrap, u la kyntu bad khot lang ïa baroh ki tnat treikam jong ka sorkar ban don ka jingiatreilang ban kyntiew ïa ka pule puthi ha ka jylla.
Utei u myntri ka sorkar jylla u la pynsngew ruh ba ka Ministry of Education ka la pyntreikam ïa ka policy ba thymmai lane ka education policy, ka ban kham pher ha ka rukom ai jinghikai, u la kyntu ïa ki khynnah bad ïa ki nonghikai ban kham pyn ïar shuh shuh ïa ka jingmut jingpyrkhat bad pynïasoh bad kiwei ki ri jong ka pyrthei.
Ka kong Santa Mary Shylla, ka la kyntu ïa ki nonghikai ba kin ai ïa ka jinghikai kaba bha ïa ki khynnah, ka la ai ruh ka jingiaroh ïa ki bor district ba la lam khmat da u Deputy Commissioner, u Abhilash Baranwal, IAS halor ka jingpyntreikam ïa kane ka project “Ka Lawei” ha ki shlem ai jingnang jingstad ïa ki khynnah ka ban pynlong ïa ki nonghikai bad ïa ki khynnah ba kin long mlien ha ka ka rukom ai jinghikai kaba thymmai.
Katei ka nongmihkhmat na Sutnga Saipung Constituency, ka la pynbna ruh ïa ka jingnoh syniang kaba na ka Special Rural Works Programme (SRWP) kaba T 10 lak tyngka sah ki skul kiba don hapoh ka district khnang ban kyntiew shuh shuh ïa ka pule puthi, khnang ba kan nym don ka jingthut ha ka bor ding ha ka por ba ki khynnah ki dang pule ha ki skul ha kine ki smart class room.
U bah H. M. Shangpliang, u la ai ka jingiaroh halor kane ka project “Ka Lawei” bad kyrmen ruh ïa kaba kum kane ka project yn lah ban pynrung sa ha kiwei kiwei ki skul ruh kiba don hapoh ka district ki ba ym pat ioh ïa kane ka Digital Smart Class Room, u ai jingmut ïa ka sorkar ba ka dei ban theh shuh ki jingiarap ba kan long ka jingmyntoi ïa ki khynnah pule lyngba kine ki Smart Class Room ban wanrah ruh ïa ka jingkylla dur ha ka pule puthi bad ha ka rukom ai jinghikai ïa ki khynnah hapoh skul.
Kiba la ai jingkren ki kynthup ruh u Deputy Commissioner, East Jaiñtia Hills District, u A. Baranwal, IAS, uba la batai shaphang kane ka project Ka Lawei, u Addl. Deputy Commissioner, East Jaiñtia Hills District, u bah G. Warjri, MCS, ka District School Education Officer, ka kong P.Dkhar, u Principal Don Bosco College, Byndihati, u Father. George. Lyngkhoi bad kiwei kiwei.
Ha kane ka prokram, utei u myntri sorkar, u Rakkam A. Sangma, ka kong Santa Mary Shylla, u bah H. M. Shangpliang, ka kong P.Dkhar, ki la pynkup burom da ki momento, ïa ki khyndai ngut ki nonghikai kiba na ki skul bapher bapher kiba hikai ha ki class 8, 9, 10, kiba hikai ha ka subject Mathematics, Science bad Social science bad la ai khusnam ruh sha ki lai tylli ki skul kiba na East Jaiñtia Hills District, kiba la leh bha ïa kane ka project “Ka Lawei”
Ha kane ka prokram la pyni ruh ïa ka video, documentary ba kyngkot halor ka project “Ka Lawei” bad ruh hadien kane u myntri sorkar lem bad ki heh sorkar, lem bad ka MLA, ki la leit ban jurip ïa ka Smart Digital Classroom, ka Byndihati Secondary School, Byndihati.
Hadien katei ka jingjrip, u myntri sorkar u la leh ruh ïa ka review meeting bad ki heh sorkar jong ka district kiba na ka tnat pule puthi bad ïakren ruh bad ki nonghikai skul Primary ha conference hall ha ophis jong u Deputy Commissioner ha Khliehriat.