Shillong, Nailar, 07: U Chairman jong ka Meghalaya State Planning Board (MSPB) Bah Metbah Lyngdoh ha ka lah Sngi u Blei ula ongba un sa phah ïa ka kaiphod halor ka jingshah pynngat kyrdan ka Meghalaya kum ka jylla kaba duk tasam ha ka ri.
“Ngin sa pan baroh ki jingtip ba bniah khnang ban tip ïa ka jingshisha ïa ka kyrdan jong ka jylla kumba la paw,” ong u Bah Metbah ha ka jingïakren bad ki lad pathai khubor.
Ka Meghalaya ka la shah pynngat ha ka kyrdan ba duk tasam ha ka ri India napdeng ki san tylli ki jylla baduk tam. Kane ka la paw pyrthei katkum ka kaiphod ba la ai kyrteng, ‘National Multidimensional Poverty Index (MPI): A Progress Review 2023’ ba la pyllait paibah da ka Niti Aayog ha ka 17 tarik, Naitung.
U Bah Metbah uba long ruh u Lamphang barim ka Ingdorbar Thawain ka Jylla, u la ong ba ka Board kan sa aiti ïa ka jingai jingmut sha ka Sorkar.
“Ngin sa shong bad ngin sa peit kaei kaba ngi dei ban leh na ka liang jong ka Planning Board khnang ba ngin dup lah ban ai jingmut sha ka Sorkar lada donkam,” u la bynrap.
U la ïathuh shuh shuh ba shen un sa lum ka jingïalang jong ka Board.
“Ym tang halor ka jingïoh kyrdan ka jylla, ngin sa ïathir ïatai sani ruh ïa kiwei kiwei ki mat. Ngin sa pyrkhat ruh ïa kiwei ki lad ki lynti,” ong u Bah Metbah da kaba bynrap ba un sa buh ïa ka tarik ban shong jingïalang jong ka Board lashai ka sngi.
