Shibun ki jingkular buh u President ka BJP ban trei lada jop kum u MLA ka Shillong West

Shillong, K’Lyngkot 11 : U President ka BJP ba dei ruh u kyrtong na West Shillong, Bah Ernest Mawrie u la kular ban peit ba ka roi ka par ka dei ban long ryntih ha baroh ki liang ha ka constituency jong u.
Ha ka kyrwoh, u Bah Mawrie u la ong ba ka thong kaba hakhmat eh ka long ban weng ïa ka dheng kali ha Mawbah da kaba pynïaid noh tang shi laiñ (oneway), kata da kaba pynïasoh noh da ka surok na ba kut jong ka Mawbah bad ka TB Hospital khnang ban weng ïa ka dheng kali ha shi lynti jong katei ka lynti nalor ka jingshna ïa ki lynti ïaid kjat na ka bynta kiba ïaid kjat.
Shuh shuh u ong ruh ba un sa tyrwa ban pynkynriah noh ïa ka TB Hospital bad ban pynitkna ba ïa katei ka jaka dei ban pyndonkam noh na ka bynta ban tei ïa ki hospital kiban biang lut nadong shadong ha ka ri kaban long ruh ka hospital kaba paka tam ha ka jylla.
Nalorkata, u ong ruh ba u kwah ba ka ïew die madan kaba don ha Mawbah bad Jhalupara yn sa peit ban pynkylla noh ïa ka sha ka Hawker Centre kaban shna bha da kaba shim ïa ka buit jong ka Singapore kaban don lang bad ka jaka pynïeng kali. Ïa kane u ong ba yn sa leh da kaba treilang bad ka Ministry of Defence jong ka sorkar pdeng ba ïalam da ka sorkar BJP.
U ong ruh na bynta ka madan Gorkha Patshala yn sa siang noh da u phlang artificial turf bad kiwei kiwei ki jingshna katkum ka juk mynta hapoh ka skim Khelo India Khelo. Shuh shuh u ong ruh ba un tyrwa ruh ïa ka jingkyrshan pisa kaba 100 persen na ka bynta ki Temple bad ki ïingmane hapoh ka skim Prasad, Tourism Department jong ka sorkar pdeng. U kam ruh ba un sa tyrwa wat ban pynmih pisa na ka bynta ka Seng Raid bad Seng Khasi jong ka West Shillong na ki tnad bapher bapher kynthup na ka Ministry of Minority Affairs.
U la ong ruh ba lada u shah jied kum u MLA wat ïa ka tulop kaba u ïoh un sa pyndonkam na ka bynta ki duk ki suk.