Shillong, Nailar 9 : Ka Meghalaya Schools Welfare Development Association (MSWDA) ka la ai por shibnai ïa ka sorkar jylla ban khot ïa ka jingïalang bad u Myntri Rangbah ka jylla u Conrad K Sangma khnang ban ïoh ïakren ïa kiba bun ki mat kiba ïadei bad ka pule puthi hapoh ka jylla.
ïa kane ka rai la shim ha ka jingïalang jong ki nongpynïaid bad ki managing committee jong ki skul kaba la long ha Khasi National Dorbar Hall, Mawkhar ha ka 8 tarik Nailar 2026 hapoh ka jingpynïaid u President jongka u HM Marbaniang.
Ha kane ka jingïalang ka Seng ka la shim hynriew tylli ki rai bad ïa kine kin sa leit aiti sha ka sorkar lyngba ka tnad pule puthi. U President u bah Marbaniang ula ong ba ha ka jingïalang la bishar bniah ruh halor ka Meghalaya School Performance Grading Index bad ong ba wat la ka pule puthi ka la nang kiew hynrei ka sorkar ka dei ruh ban shim khia halor kiba bun ki mat kiba sahteng ha ka pule puthi.
Hooid ka MSPGI kan ïarap ban ithuh ïa ka jingtbit bad jingtlot jongki skul hynrei katba ka sorkar kam pat pynbiang ïa ki jingdonkam ha ki skul bad khamtam ïa ki Nonghikai bad kumjuh ruh ban ïarap pisa kata ka jingkiew kan sahkut hajuh.
Kiwei kiwei ki jingdawa ki long kum ka Grant- in -aid na ka bynta ki Secondary bad Higher Secondary School kiba la shakri slem hynrei ki bym pat ïoh jingïarap ei ei haduh mynta. Ka Seng ka la buh ruh ha khmat ïa ka jingeh jongki 1544 SSA Non NOC Lower bad Upper Primary skul bad kumba 110 ngut pat ha ri lum Garo kiba ym pat ïoh jingïarap kaba biang haduh mynta.
Kiwei kiwei ki rai ki long ka jngpynkhlaiñ ïa ki Lower bad Upper Primary School ban pynbeit ïa ka jingeh ki nonghikai kiba la pyndep ïa ka D.El, ED lyngba ka NIOS, kyntiew ïa ki jingdonkam ba nadong shadong ha ki skul, bad pynjanai ïa ka jingpule computer, science lab, library, sports bad kiwei kiwei.
Ka Association kala kyntu ruh ban pyntreikam bha ïa ki skhim ka Sorkar Pdeng kum ka PM-POSHAN, Uniform Grant bad ka Composite School Grant.
U Bah Marbaniang ula ong ba ka jingthmu hi kam dei tang ban shu buh ïa ki jingeh hynrei ban kyntur ïa ki lad ban pynbeit kiba neh.
Ula pynkynmaw ba kum kane ka jingïasyllok la pynlong ha Tura ha ka 20 tarik Jylliew na ka bynta ki skul ka ri-lum Garo.
Ka Association ka khmih lynti ba ka Sorkar kan ai jubab hapoh ka shibnai bad ban pynbeit ïa ka jingïalang bad u Myntri Rangbah.
