Shillong, Nailar 26: Ka khubor ba la ïoh na ki pulit la ïathuh ba u Platoon Commander, A-Coy, 193rd Bn., BSF, BOP Rajapara (SWKH) u la phah ka jingujor ba ha ka 19 tarik mynta u bnai ha ka por kumba 5.20 baje mynstep, ki shipai BSF ki la ïohi ba ki don ki runar nong Bangladesh bad ki nongkhaïi beaiï ïa ka shini hapoh u pud u sam ka India kiba don hapoh ka BP No. 1211/2-S. Kham hadien haba la ïohi ïa kitei ki runar na ka liang ki BSF ki kawang ïa uwei u stun grenade bad siat ruh shi kuli da u kuli PAG 12-bore ammunition, ha kaba kitei ki runar ki la phet krad noh na katei ka jaka.
Ha kawei pat ka jingjia u Coy Commander, A-Coy, 172 Bn., BSF, BOP Ratacherra (EJH) u la phah ka jingujor ba ha ka 22 tarik mynta u bnai ha ka por kumba 4.20 baje janmied, ki shipai BSF ki la ïoh bat ïa kumba 4 ngut ki nong Bangla kiba la ithuh kyrteng da u Bashir Ahmed (40 yrs), ka Majuna Khatoon (38 yrs) bad 2 ngut ki khynnah bad 2 ngut ki nong India kiba kyrteng u Binod Baisnav (21 yrs) bad Ratindra Baisnav (21 yrs) na kawei ka jaka kaba don ha khappud ka Bangladesh-Meghalaya-Assam Border kaba ha MCP Ratacherra (EJH).
Shuh shuh ki pulit ki la ïathuh ba u Ramesh Singh, Site Manager, MIDAS Constructions u la phah ka jingujor ba u la ïoh ka jingpyntip ba ha ka 9 tarik u Naitung, 2024 bad ha ka 4 tarik mynta u bnai, 2024, kiba bun ki tiar kiba la pynpra na ka jingkieng kiba la shongdor kumba T. 10 / 12 lak, la shem ba la shah tuh napoh ka camp store jong ka company.
