Shillong, Nailar 26: Kumba 15 ngut ki MP bad kumba 135 ngut ki MLA ki la pynbna ba ki don ki kam ba ki la leh ban thombor pyrshah ïa ki kynthei. Kiba bun tam na kine ki nongthaw aiï ki dei napoh ka jylla West Bengal, ong ka kaiphot kaba la pymih dangshen.
Ïa kane ka kaiphod la pynshong nongrim halor ka jingkheiñ kaba la ong ba na ki 755 ngut kumba 776 ki affidavit ki la don ba la shah ujor halor ki MP kiba mynta bad kumba 3,938 na ki MLA kiba don kumba 4,033 ngut kiba don na baroh 28 tylli ki jylla bad ki 8 tylli ki Union Territory ha kine ki san snem ba la leit ki don ïa ki kam runar pyrshah ïa ki kynthei.
Ïa kane kaiphot la pynkhreh da ka Association for Democratic Reforms and National Election Watch, ka kynthup ruh ïa ki affidavit ba la ai ha ka por ba pynlong ïa ka election shiteng samoi ha ki por ba la don ki jingiehnoh kam, ka jingïap bad kiwei pat ki daw.
Napdeng ki seng saiñ pyrthei, ka Bharatiya Janata Party ka don bun ki MP bad ki MLA kiba mynta ba ki don mukotduma pyrshah ïa ki bad kumba 54 ngut kidei na kane hi ka seng, ba la pynbud pat sa ka Congress kaba don 23 ngut bad ka Telugu Desam Party kaba don kumba 17 ngut.
Napdeng ki jylla, ka West Bengal ka don bun ngut ki MP ne MLA ha kaba kumba 25 ngut na ki kidon ïa kine mukotduma pyrshah ba thombor ïa ki kynthei. Ba la pynbud pat sa ka jylla Andhra Pradesh kaba 21 ngut kum kine ki nongthaw aiñ bad ka Odisha kaba don kumba 17 ngut ki MP/MLA kiba la pynbna ba ki don ïa kine ki kam runar.
Ka kaiphot ka ïathuh ruh ba ki don kumba 16 ngut ki MP ba mynta bad ki MLA kiba la pynbna ba ki don ïa ki kam runar pyrshah ïa ki kynthei kaba hab ruh hapoh ka Indian Penal Code Section 376, kaba don ka jingpynsaja kaba 10 snem ban shong along bad kaba lah ruh ban poi shaduh ka jingshong along kaba shyrta jingim.
