Shillong, Nailar 26: U Bah Roshem Myrthong shongknor bad u Bah Zandy Myrthong Secretary ka ka Joint Committee of Local People on Kynshi Hydro Power Project (JCLPKHPP) ki la ai ïa ka jingthoh sha u Myntri Rangbah ka jylla lyngba u Myntri ba dei peit ïa ka tnad kam bording u A T Mondal ban khot tender noh ban pyntrei ïa ka to Kynshi Hydro Power Project Stage – I.
Ha ka shithi kaba ka Joint Committee of Local People halor Kynshi Hydro Power Project Stage- I ka la phah sha u Myntri Rangbah ka jylla u Conrad Sangma lyngba u Myntri kam bording ki la kyntu ïa ka sorkar ba kan khot tender thymmai noh ban pyntrei ïa katei ïa jaka pynmih bording hadien ba kane ka sorkar ka la pyndam noh ïa ka soskular kaba la ïasoi ha u snem 2007 bad ka M/s Anthina Pvt Ltd namar ka jingbym sdang jong ka ban pyntrei ïa ka kam.
Kum ka kynhun ka pynpaw ïa ka jingsngewnguh ïa ka sorkar kaba la pyndam noh ïa ka soskular kaba la ïasoi bad ka M/s AnthinaPvt Ltd namar ba ka khlem sdang ïa ka jingtrei kumba la ïatehkular, da kane ka jingpyndam noh ïa ka soskular ka la plie ïa ka sorkar ïa ka lad kaba thymmai ban khot tender noh ban pyntrei ïa katei ka jaka pynmih bording electric ha Wah Kynshi.
Na ka liang ka seng kaba la thaw na ka bynta kane kam ka kwah ban ïohi ba ka sorkar kan pyntrei kam ïa kane ka jaka pynmih bording na ka wah Kynshi ym ban pyndam noh na ka jingleh bakla ha ki por kiba la dep, kum ka seng ka kwah ban ïohi ba ka sorkar ka dei ban pyntrei ïa kane ka kam ban pynmih bording na katei ka jaka da kaba khot tender thymmai noh.
Namar ka la don ka jingbym lah jong ki kompeni shimet kum ba ka la paw ha kine ki snem kiba la leit na ka liang jong ka seng ka kyntu ïa ka sorkar ba lada khot tender thymmai ban pyntrei noh ïa kane ka jaka pynmih bording, ki ïohi ba dei tang ka North Eastern Electric Power Corporation Limited (NEEPCO) kaba lah ban pyntrei ïa ka kam, lada long kaba ba lah ban ai sha katei ka kompeni jong ka sorkar pdeng.
Na ka liang jong ka seng ka kyntu ïa ka sorkar ba kan burom ïa ki briew jong katei ka thaiñ ba la da thaw ïa ka committee dei ban donlang ki dkhot ha ka committee kiba dei na katei ka thaiñ kane ka long ban pynthikna ba ka jingpyntrei kam kan long kaba ïaid beit ïaid ryntih bad ki kwah ban ïohi ba ka jingpyntrei kam ym dei shuh ban pynslem khnang ba ki briew katei ka thaiñ ruh kin ïohkam ïohjam.
Kum ka kynhun ka don ka jingshaniah ha kane ka sorkar kaba mynta ban pyntreikam ïa kane ka jingshna ïa kane ka jaka pynmih bording elektrik na katei ka jaka na ka bynta ka jingmyntoi ka jylla bad ki paidbah katei ka thaiñ bad ba ka sorkar kan pdiang ïa kane ka jingai jingmut lada donlang ha katei ka committee.
