Shillong, Naiwieng 25: U Myntri ka tnat PHE u Marcuise N Marak shen un sa pynlong ïa ki jingshong bishar kam haba ïadei bad ka jingpyntreikam jong kiba bun tylli ki project da kane ka tnat.
Haba kren sha ki lad pathai khubor u Marak u la ong ba un sa shong bishar ïa kine ki project kiba don ha ki 3 tylli ki division ha ka 28 tarik mynta u bnai.
“Ngan sa shong bishar ïa ki kam hapoh ka tnat PHE bad ha ka 28 tarik mynta u bnai ngan leit sha Mawkyrwat ban khmihbniah ïa ki 3 tylli ki division, kawei kadei ka Mairang, nangta ka Nongstoiñ bad Mawkyrwat. Ngan leit ruh ban jurip sha ki jaka ban pyntrei ïa ki projek,” u la pyntip.
“Nga sa shongbishar ruh halor ka JJM bad kiwei ruh ki project kumjuh,” ong u Myntri.
U Marak u la ong ba katkum ki kaiphod pyntreikam, baroh ki la long kiba ïaid beit kumba la kdew bad katkum ki kam ba ju leh manla ka por bad kiba dang donkam ban bteng.
“Ki kam ki la ïaid ha ka lynti kaba bha, hynrei nga pat ban tip dalade donkam ban leit jngoh sha ki jaka ba pyntreikam ïa kine ki projek. Nga kwah ban ïohi haduh katkum ki kam ki la ïaid,” u la bynrap.
Haba kylli, na ka liang u Myntri u la pyntip ba ka tnat ka la tyrwa ban don ki jingpynïaid ia ki kam bad ki jingpynneh ïa ki kyndon.
“Ngin sa don da ka operation bad ka maintenance rule, ha kaba yn sa mynjur shen, ka dangsah mynta ban ïoh ka jingmynjur na ka kynhun ki myntri bad shisien ba la mynjur bad pynskhem, ngan sa pynthikna ba ki kam ki ïaid katkum ki jingpyntreikam jong baroh ki project kiba don hapoh ka tnat PHE,” u la ong.
Halor ka kam jong ka Greater Shillong Water Supply Scheme (GSWSS – III) kaba dei kaba la khmih lynti bha, u Myntri u la ong, “Mynta baroh ki kam ki la long ha ka lynti kaba dei. Ka kam, kaba la sah la slem bha, mynta ka la dep sdang. Ngan sa shongbishar kam ruh halor kane ka project mynta. Dei tang hadien ba nga shongbishar kam ngan sa lah ban ïathuh ïaphi halor ka jinglong jingman jong ka kam.”
U la ong ba ka thong ba la buh ban pyndep ïa kane ka project ka dei ha u bnai Lber jong u snem ban wan.
U Myntri u la pyntip ruh da kaba ong, “Hadien jong ka jingpynheh bad pynkiew kaba 3 jong kane ka project, kan ym dei ban don kano kano ka jingeh halor ka kam pisa na ka bynta ka GSWSS phase III.”
Haba kylli ïa ka jingslem ban pyndep ïa kine ki projek baroh, u Myntri u la ong ba baroh ka jingeh ka dei na ka jingbym ïoh ka jaka.
“Katto katne ki project ki la hap ban slem dei na ka daw jong ka kam jaka. Ki la don bun ki jingïasyllok ha kaba kane ruh ka dei kawei na ki daw. Katto katne ki project ki la hap ban slem naba donkam ruh ban ïoh ïa ka forest clearance. Ki don bun ki rukom treikam kiba hap ban ïaid kaba la pynlong ruh ban shim ïa ka por, dei na kane ka daw balei ngi shim por slem,” u la ong.
Haba ïadei bad ka jingtyrkhong jong ki tyllong um ha ka jylla, u Myntri ua la kyrpad ïa ki nongshong shnong ban ïarap ha ka ban pynneh, ban ïada bad ban tyngkai ïa ki tyllong um.
“Nga kwah ban kyrpad ïa ki nongshong shnong ka jylla Meghalalya, ngim lah ban leh eiei halor ki jingtyrkhong ki tyllong um, naba ka jingtuid ki tyllong um ka la nang duna bad dei halor kane ba ka sorkar ka la shim bun ki kam ban pynim ïa kito ki tyllong um kiba la tyrkhong, da kaba donkam ban pynthymmai biang bad ki la don ruh ki projek kiba la sdang ban ïaid mynta halor kane bynta. Shisien ba la pyndep ïa kane, ngin sa lah ban pynbeit ïa kane ka jinglong jingman kaba ngi mad mynta,” u la ong.
