Pyrshah ka Raij Namdong ba kwah ka shnong Thadmynri ban leit sha Elaka Nartiang

Jowai, Naiwieng 25: Ka Raij Namdong hapoh ka jingïalam ki nongkitkam bad ki Waheh Shnong ryngkat bad ki paidbah kiba bun na ka shnong Namdong– A bad B bad ka shnong Mukhnang ki la mih paidbah mynta ka sngi 25 tarik u Naiwieng naduh ka por 9 baje haduh 2 baje janmiet ban pyrshah ïa ka jingthmu pyllong Dorbar jong ka Administrative Officer (AO) ha Thadmynri ban pyni ïa ka jingkwah jong ki ban leit sha Elaka Nartiang.
Ha kane ka sngi ki paidbah ryngkat bad ki nongïalam kila mih ban ap ïa ka Administrative Officer ha Namdong–B, ha ka surok ban leit sha Thadmynri hadien ka jingap kaba naduh ka por 9 baje haduh 12:00 baje hynrei ka Administrative Officer (AO) kam shym la wan sha kane ka Dorbar kaba la phah pyllong.
Kumta ki nongïalam bad ki paidbah ki la shim ban pyllong ïa ka jingïalang ha kane ka jaka ban pynpaw pyrthei ïa kane ka jingpyrshah jong ki, halor kane ka jingleh kulmar jong ka Administrative Officer (AO) bad ka Executive Committee hapoh ka jingïalam jong u ma Thombor Shiwat, CEM ka JHADC.
Ïa kane ka jingïalang la pynïaid da u Rangbah L. Pale, Chairman Raij Namdong ki rangbah kiba la ai jingkren ha kane ka sngi naduh u Waheh Raij ma L. Lyngdoh, Secretary Raij u I. Pakma Waheh Shnong Namdong– B Waheh Shnong Namdong– A Waheh Shnong Ladmyngngor, Waheh Shnong Mukhnang u Rangbah Apostol Shadap ki longkmie ka kong M. Tariang bad ka Kong R. Susngi.
Baroh kine ki nongkren kiba la pynpaw ïa ka jingpyrshah bad jingsngewsih halor kane ka jinglehkulmar ka JHADC lyngba ka Administrative Officer (AO). Namar “baroh ngi la tip lut ïa ka jingshisha naduh ba sdang haduh mynta ba kane ka Thadmynri ka dei ka jaka khlaw jong ka shnong Namdong bad hadien ba ki briew na ki thaiñ Nongkhroh Umladang bad na kiwei ki jaka kila wan sha ki nongïalam Raij bad ki la pan jaka ban rep kumta ka Raij Namdong da ka jingbun ka jaka namar ba dang duna briew ha kito ki snem kala ai lad ba kin shong bad kin rep kumta katba nang ïaid ki sngi ki por ki la nangroi nangpar bad ka Raij Namdong kala pyllong ïa kane ka Thadmynri kum ka shnong lyngba ka jingïatrei lang bad u (L) Dolloi Lyngngong Snieh, Dolloi ka Elaka Nongjngi bad ka Raij Namdong ym dei na ka Elaka Nartiang” la pynpaw kine ki nongkren.
Ki pynsngew kaba pynsngewsih mynta ka long ba kine ki briew kila kwah ban mih noh na kane ka jaka ban leit sha ka Elaka Nartiang khlem kano kano ka daw bad ka jingpynshisha kaba biang namar ba ki dei tang ki briew kiba dang shu poi sha kane ka jaka dang da ki phew snem mynta.
Halor kane baroh kiba kren lyngba ka sur u paidbah ki la pynrem jur ïa kane ka jingthaw jingkulmar ka JHADC hapoh ka Raij Namdong bad da kawei ka sur kila shim ïa ka rai lang ba “ïa ki briew ngim khang ba kin leit sha kano kano ka Elaka, hynrei ïa ka jaka putta kim bit shuh ban kam hok bad ban pyndonkam hapoh ka Raij Namdong bad ki lah ban leit sha Nartiang bad pan jaka na ka Nartiang lada ka lah ban ai ïa ki hynrei ka jingïalang mynta ka sngi kila rai ba kim ai lad ba kin pyndonkam shuh ïa kine ki jaka kaba la ai sngewbha ba kin shong kin sah bad ba kin rep kin riang, namar kane ka jingkwah brai jong ki”, la pynkut ka kyrwoh na kane ka Dorbar paidbah mynta ka sngi.