Jowai, Naiwieng, 25: Ka District Hub Empowerment of Women, jong ka tnad Social Welfare, West Jaiñtia Hills District ryngkat ka jingïatreilang bad ka Jowai Police Department bad ka West Jaiñtia Hills District Taekwondo Association, mynta ka sngi kila sdang ïa ka prokram ai jinghikai halor ka “Elimination of Gender based violence and self-defense” na ka bynta ki kynthei, shi bynta na ka ‘International Day for the Elimination of Violence Against Women’ kaba la long ha Dorbar Hall ka Dulong, Jowai.
Ha kane ka sngi u Bah G. H Passah, MCS Assistant Commissioner, Jowai ula long kum u kongsan, ka jingthmu ba kongsan jong kane ka prokram ka long shi bynat ban ai jingtip khambniah sha ki kynthei ba kin tip kumno ban ïada ïalade na ki jingshah thombor ha ki riew sniew.
U Bah C. Langstang, Secretary West Jaiñtia Hills District Taekwondo Association bad u Joint Secretary Meghalaya Taekwondo Association ula ai jinghikai halor ka Taekwondo.
U kongsan haba ai jingkren ula ong kren shaphang ka jingeh ba ki kynthei ki ïa kynduh da kaba ong kane kam dei tang ïa ki kynthei hynrei wat ha ka imlang ka sahlang ruh ki ïa kynduh, ula kyntu donkam ban ïoh ki lad jinghikai ban lait na ka jingshah lehbor. Ula khot ruh ïa baroh ki nongshong shnong ba kin trei shitom ban pynduh khoit ïa kum kine ki kam sniew kiba long pyrshah ïa ki kynthei.
U FGN Rynga, District Mission Coordinator (DMC) ula kren halor ka Mission Shati Schemes kum kawei na ka Centre, ka Women Helpline 181, Beti Bachao Beti Padhao, Pradhan Mantri Matru Vanddana Yojana bad ka Palna. Shuh shuh ula pynnsngew ha kine ki 16 sngi ka jingai jinghikai kaba la sdang naduh mynta ka sngi 25 tarik u Naiwieng haduh 10 tarik u Nohprah, 2024 kan don ruh ka jingai jinghikai ba san sngi shaphang ki rukom ïada ïa ki kynthei.
Officer incharge Jowai Police Station ma S. Shadap Mannar ula kren shaphang ka jingjylliew ki kam thok kam shukor na ki bor jong ka juk stad lyngba ki online, kumta u buh ka jingkyntu ban long kiba husiar bha ban nym ai jingtip klumar ïa ki kam shimet.
Katba ka kong I Kharpran, Officer incharge Women Police Station Jowai kala kren halor ka POCSO Act bad kiwei de ki kyndon aiñ kiba ïada na ka jingshah thombor ki khynnah rit. Ïa ki kyntien ai khublei la ïoh na u Y. Najiar, District Social Welfare Officer cum District Nodal Officer, DHEW, Jowai.
