Shillong, Naiwieng 25: Ka 11th edition jong ka International Sustainability Conference (SUSCON-XI), ba la pynlong da ka IIM Shillong halor ka phang Climate Positive World, ka la kutnoh da kaba jop, ha kaba kane ka prokram ka la wanrah ïa ka jingkiew jong kane ka jaka pule kaba dei ka prokram kaba shisien shisnem.
Ïa kane ka jingïakynduhlang la kyrshan da ka GAIL India Ltd and Numaligarh Refinery Ltd kum ka Industry Sponsors, IIMS Journal ka Management Science kum ka Publication Partner, bad ka Corporate Environmental Management (CEM) Research Group ha Jyväslylä School of Business and Economics (JSBE), University of Jyväskylä, Finland kum ka Knowledge Partner.
U Prof. Basav Roychoudhury, Dean-Research, IIM Shillong, ha ka prokram u la pdiang sngewbha ïa kiba ïashim bynta bad kiba la shah khot sngewbha ha ka conference, ha kaba kane ka la ai ka lad ban ïa sam ïa ki jingmut bad kiwei ki kam.
Ha kane ka conference, ki nongïashim bynta na kylleng ka India, Hungary, USA, bad Finland ki la ïasam ki jingwadbniah bad ki nuksa, ha kaba ki la don haduh 301 ki jubab la aiti ha kane ka sngi, ha kaba na kitei, kumba 118 tylli ki kot la shah jied hadien ba la khmih bniah. Ka jingai ïa ki jingwadbniah ka pyni ïa ka jinglong ba la kloi ki ri ka pyrthei ha kane ka snem bad ka jingdonkam ban kyntiew ïa ki kam karkhana, bad ka imlang sahlang.
Ka SUSCON ka la pynïar ïa ki kam ki jam hapoh ka rynsan jong ka pyrthei na ka bynta ki jingïakren ha kine ki 15 snem ba la leit, ban pynïatylli ïa ki karkhana, ki kam pule, ki kam sorkar bad ka imlang sahlang. Kane ka la pashat ïa ka jinglong ba la kloi ka IIM Shillong na ka bynta ki kam pynneh, bad kaba la pynpaw ruh ïa ka jingïoh burom u Dr. APJ Kalam kum uwei na kiba ïoh ïa ka Bharat Ratna, Padma Bhushan Dr. Sundarlal Bahuguna, bad u Jadav Payeng, uba la ïoh ïa ka “Forest Man of India.”
U Kongsan u Shyam Sundar Paliwal (Padma Shri), u la kren halor ka jingdonkam ban ïeng halade bad ka jingpynneh ïa ki kam shnong kam thaw ha ki thaiñ nongkyndong. U Paliwal, uba la shah pynkup burom da ka Padma Shree halor ki kam jong u, u la sam ïa ki khana kiba ai mynsiem halor ki kam ba u la sdang ha Piplantri, ha kaba u la thung haduh 111 tylli ki dieng na ka bynta kawei kawei ka khun kynthei ba kha ha ka shnong, kaba long ka dak jong ka roi ka san bad ka jingpynkupbor.
Ki kam jong u, kim dei tang ka kam pynneh pynsah ïa ka sawdong sawkun hynrei ka kyntiew ruh ïa ka pateng ka pule puthi ki kynthei khynnah, ban pynduna ïa ka jingdawa dowry, bad kiwei kiwei ki kam.
U la banjur halor ka jingdonkam ban pynneh ïa ka sawdong sawkun, ban ïajan bad ka sawdong sawkun ne ka mariang, ban pynbha ïa ka imlang sahlang bad ban kyntiew ïa ka ïoh ka kot bad ban thaw ruh ka jinglong ban ïeng halade bad dalade bad ban pynkupbor ïa ki shnong ki thaw.
Ha ka jingkren u Prabodha Acharya, Chief Sustainability Officer, JSW Group, uba dei u symbud kongsan, u la kren halor ki 3 tylli ki bynta bad kine kidei ka mariang, ka jingbym ïaryngkat, bad ka jingbun ki jingïapher ha kane ka ri. Haba shim na ki jingtip ba ïar jong u halor ka corporate sector, u Acharya u la pynpaw ka jingdonkam kaba mardor ïa ki kam ki jam ki ban long ha ka lynti ka jingpynneh kiba ïarap ïa ka imlang sahlang bad ïa ka sawdong sawkun.
U la pynshlur ba ki nongïalam ka pateng ban wan, bad ki samla pule kiba shimbynta ha ka conference, ban pyrkhat ïa ki jingdon bynta jong ki ha ki kam lyngba ki kam ba ki trei bad ka jingdonkam ban long ki nongïalam.
Kane ka 11th edition ka conference ka la aibor biang ïa ka IIM Shillong ba kan kiew biang kum kawei na ki jaka pule. Ki jingïasyllok, ki jingïatreilang, bad ki jingmut kiba thymmai ha kaba kane khlem artatien kan pynshlur ïa ka pateng ban wan ha kiba bun ki liang la ka long ha ka jingkylla ka mariang, ban pynbha ïa ka sawdong sawkun bad kiwei ki bynta.
