Nongstoiñ, Naiwieng 25: U bnai Naiwieng u dei u bnai ba baroh ki nongrep ki la ïa bun kam ha kaba ïabeh sha la ki pynthor ki hali ban lum ban lang ïa u kba u khaw u ba ki la rep bad trei shitom baroh shi snem. Hynrei ha ka jinglong jingman jong ka rep ka riang mynta u snem, ka long ka bym da thikna khamtam u kba u ba dei u mar rep u ba kongsan tam jong ki paitbah nongshong shnong ha West Khasi Hills.
Halor kane ka bynta la pynpaw da u bah H.Wanñiang uba don ka jaka rep kba ha pdeng ka pyntha Umyiap, u ba la ong ba ka jingïoh lum kba mynta u snem ka kham duna haba ïanujor bad kiwei pat ki snem bad haba peit ïa ka jinglong jingman imat ka lah ban dei na ka jingkylla sted jong ka mariang.
Nalor kata ha ka taïew ba ar jong une u bnai Naiwieng ka la don ka jinghap phria kaba malu mala hynrei wat la u phria um da jur ruh ka la ktah hi namar u kba u la ih bha bad dei na katei ka daw ba ka jingïoh kba ka duna.
Ha kajuh ka por u la ong ba haba peit ïa ka jinglong jingman jong ka suiñ bneng, ka jingshit jingkhriat ruh ka la don ka jingkylla ha kiba bun ki rukom, namar teng teng ha ka juh ka sngi shiphang ka shit, shiphang ka khriat kam long ryntih shuh kum ha ki por ba mynshuwa.
U bah Wanñiang u la ong ruh ba ka jingkylla ha ka jingsan jong u jyntang kba ruh ka la duna namar ka jingïoh lum na ka juh ka pynthor ka la kham duna. U la ong ruh ba mynta u snem, wat ki jhur ki jhep ruh ki duna bha ka jingsan bad ym lah ban tip la ka dei na ka jinglong jong ka suiñ bneng ne na ka jingduna slap ne na kano ka daw.
U la bynrap shuh shuh ba lada ka mariang bad ka jinglong ka suiñ bneng kan dang kylla da kumwei pat, ha ki snem ban wan ki nongrep ki lah ban mad shuh shuh ïa ki jingeh, namar lada ki paitbah nongrep ki dang pyndon kam ïa kajuh ka rukom rep u jingthung jingtep un nang hiar ha ka jingsan bad ka jinglong jingman.
