Shillong, Naiwieng 25: Ïa ka International Day for the Elimination of Violence against Women ne ka jingïasyllok halor ka jingshah ban beiñ pyrshah ïa ki longkmie bad ïa kane la pynlong ha ka sngi Nyngkong ha East Khasi Hills District ha ka prokram ba la pynlong hapoh ka shnong Ramkheng kaba dang hab hapoh ka Khatarshnong Laitkroh C&RD Block.
Ïa kane ka prokram la pynlong da ka District Legal Services Authority, East Khasi Hills District ha ka jingïatreilang bad ka Meghalaya State Legal Services Authority, Shillong. Ha kane ka prokram la wan ban ïashim bynta da ki nongshong shnong ka Laitmawroh bad Ramkheng.
Ha ka prokram na ka liang ka kong P. Riahtam, Legal Aid Counsel, Shillong ka la ai ka jingkren halor ka phang “Protection of Women from Domestic Violence Act, 2005 and Order for maintenance of wives, children and parents under Section 144 BNSS” bad u Bah A. Khongsit, SI, Sohra PS u la kren shaphang ka mat “Cyber Violence against women and girls”.
Ïa kane ka prokram la pynbud sa da ka jingïasyllok bad phylliew jingmut halor kitei ki phang ba la buh ha kane ka prokram.
