Shen yn sdang ki Regional Committee ban jurip ïa ki 6 tylli ki bynta ba kajia pud hapdeng ka Assam bad Meghalaya

Nongpoh, Jymmang 24: Kumba ka sorkar Meghalaya bad ka sorkar Assam ha ka kyrdan jong ki myntri rangbah ka jylla ki la dep ban ïa pynbeit ïa ki 6 tylli ki bynta jong ki jaka ba kajia pud (Six area of differences) hapdeng ka Assam bad ka Meghalaya ha ka wat kaba nyngkong bad ban bteng pat sa ïa ki 6 tylli ki jaka ba dang ïa kajia pud bad kiba ym pat lah ban ïa pynbeit ha ka kyrdan ki myntri rangbah mynta ka sngi la pynlong ïa ka jingïakren ïa ki kam pynbeit pud ba la pynlong ha Khanapara ha khappud ka Meghalaya bad ka Assam.
Hadien ka jingïakynduh jong kitei ki ar myntri rangbah mynta ka sngi, naduh u Myntri rangbah ka jylla Assam, u Himanta Biswas Sharma bad u Myntri Rangbah ka Meghalaya, u Conrad K. Sangma, ki la pyntip ba lyngba kane ka jingïakynduh ba nyngkong na ka bynta ban ïa pynbeit ïa ki kam pud kam sam ba dang sah teng jong ka wat kaba ar bad ba dang don sa 6 tylli ki jaka ba dang ïa kajia pud ki la shim ïa kata ka rai ban ïaid beit shakhmat ban ïa pynbeit ïa kine ki jingïakajia pud bad ki la rai ruh ban ïa pynbeit da kaba bishar bniah bha na baroh ar liang khnang kane ka jingeh jong ki kam pud kam sam hapdeng ka Meghalaya bad ka Assam kin kut noh.
Kumba la ïathuh da kitei ki myntri rangbah ka Meghalaya bad ka Assam sha ki Nongthoh Khubor, la ong ba ki don haduh 3 tylli ki Regional Committee kynthup na ka Assam bad na Meghalaya ba la khlieh da ki myntri sorkar, ha kaba kine ki Regional Committee kin shim ïa ka bynta ban lum jingtip na baroh ki liang halor kane ka kam pynbeit pud ha ka wat kaba ar bad baroh ki jinglup jingtip jong kine ki Regional Committee ki hap ban phah ïa ka kaiphod sha ka sorkar shuwa u bnai Naitung 2023 bad na ka liang ki myntri rangbah kin sa ïa shong pyrkhat biang na ka bynta ban shim rai halor kine ki kam pynbeit pud kiba dang sahteng bad kiba ym pat lah ban ïa pynbeit.
Shuh shuh, la ong ba ki Regional Committee ki hap ban leit jurip sha baroh kitei ki jaka kaba hap ha ka jingïakajia pud hapdeng ka Assam bad ka Meghalaya bad ki hap ruh ban lum jingtip ka ba bniah na baroh ar liang da kaba lum ki kot ki sla bad kiwei kiwei ki sakakhi bad hadien ba ki la phaha ïa ka kaiphod ki ar sorkar ha ka kyrdan ki mytnri rangbah kin bishar bniah bad kin sa shim pat ïa ka rai kano kaba bha tam ban ïa pynbeit pud khnang ba kan nym ktah la ka long ïa ki paidbah ka Assam ne ki paidbah ka Meghalaya.
Khatduh eh, kitei ki ar myntri rangbah ka Assam bad Meghalaya, ki la ong ba katba kane ka kam ïa pynbeit pud ka dang ïaid shaphrang ha kane ka wat kaba ar, ki la ban khia ruh ïa ki paidbah ba kin nym pynmih ïa kano kano ka huri hura kaba ktah ïa ka shongsuk shongsain ki paidbah bad ki dei ban ai ka jingshaniah ïa ka sorkar halor kane ka kam pynbeit pud khnang ba kane ka jingïakajia pud kan nym buh jingeh shuh hadien habud shisien ba la dep ban ïa pynbeit da kaba ïa hun lang na baroh arliang mamla, ki la bynrap.