Maroid, Risaw 17: Ka Seng Voice of the People(VPP) shen kan pynlong noh ka jingïakhih halor ki kam Chairman ba la thung da ka Sorkar MDA 2 kiba la poi da ki spah ngut.
Ïa kane la ïathuh da u Bah Ardent Basaiawmoit, President jong ka Seng ha ka jingìalang ba la pynlong lang da ka VPP Mairang bad Mawthadraishan, kaba la long ha Maroid, Eastern West Khasi Hills District.
U Bah Ardent u la ong ba ka Seng kan phah shuwa da ka jingthoh sha ka Sorkar ha kine ki sngi ban wan ban dawa ban weng noh ïa ki kam Chairman ki bym da donkam eh ban don, hynrei ki long pynban ka jingduhnong ia u paidbah.
U Bah Ardent u la ong ruh ba iwei uwei u Chairman u ïoh ka jingsiew kaba ïaryngkat dor bad ki Grade 1 Officer jong ka Sorkar Jylla, ha kaba ki ioh lut ïa ki jingsiew naduh ka baiwai ïing, ka bai umphniang, bai dawai, bai kot khubor bad kiwei kiwei de ki jingsiew.
“Kaei ka jingmyntoi na kaba thung ïa kine ki Chairman, kaei ka jingmih synñiang jong ki sha ka roi ka par ha ka jylla”, la ong u Bah Ardent.
Kiba bun ruh ki kam Chairman kidei kiba la thung da ki briew kiba la shah kyntait ha ki paidbah ha ka por elekshon, hynrei ki ïoh pat ïa ki kam kiba kham heh ha ka kyrshan.
Na ka liang ki Nongïalam ka VPP u la ong ba ka jingthung ïa ki kam Chairman ka la long ka jingpynsep ei ïa ka pisa jong u paidbah. U la ong ki Nonghikai ruh kim ïoh ïa ka tulop, ki Pulit Home Guard kiba trei shitom miet la bad sngi ha ki kam pynïaid kali kim ioh tulop da ki bnai. Nangta ki PHC, ki CHC ruh kim biang ki dawai dashin, ka jingsiew ïa ki ASHA ruh ym pynkiew. Hynrei ïa ki Chairman pat la shu pyllut phut da ki lak bad klur tyngka ha ka shi bnai shi bnai.
“Ngin dawa na ka sorkar ban weng noh ia ki bad lada la sorkar kam sngap, ngin pynlong da ka jingiakhih”, la ong u Bah Ardent.
Ha kane ka jingïalang u Bah Ardent u la pynshai ruh ïa ki mat treikam jong ka Seng bad ïa ki mat kiba ktah ïa ki paidbah bad ïa ka ri bad jaidbynriew.
Hadien ka jingïalang kumba la ju leh ha man la ki jingïalang jong ka Party ha kyllleng kylleng ki jaka, la pynlong ruh ka jingpynrung dkhot, ha kaba la ïohi ba kiba bun ki nongkyrshan na kiwei pat ki Party na ki Shnong kiba hap ha ka Mairang bad Mawthadraishan Constituency ki la iehnoh noh ïa ki Party jong ki ban wan pynïasoh noh bad ka VPP.
